香港鐵路博物館最近完成更新工程，新增非常適合打卡嘅館藏——舊式柴油電動機車，為紀念博物館原址嘅舊大埔墟火車站建成110周年，仲舉辦珍貴歷史圖片展，一家大小可以趣學香港歷史。
矚目大型展品「喬沛德號」
10月初重新開放嘅鐵路博物館，最矚目當然係最新藏品60號柴油電動機車──「喬沛德號」。60號柴油電動機車自1974年開始投入服務，係九廣鐵路最後一批引入香港嘅柴油機車之一，見證香港與內地鐵路貨運嘅黃金時代。
自從1983年九廣鐵路全面電氣化後，60號機車退出載客行列，保留牽引貨卡和工程車用途，直到2021年正式退役。佢係香港最後一架以人名命名嘅機車，以第二任九廣鐵路公司總經理嘅名命名為「喬沛德號」（Peter Quick）。
踏上復古火車路軌
除咗新增藏品60號柴油電動機車外，博物館內仲有其他特色館藏，包括香港第一部柴油電動機車51號、曾經行走沙頭角支綫嘅窄軌蒸汽火車頭、多部不同年代嘅歷史車卡等，大家可親身接觸鐵路文物，亦可踏上復古火車路軌，打卡一流，可以引起小朋友對本地鐵路歷史發展嘅興趣。
