相信唔少父母都扮過 聖誕 老人，偷偷地送份 聖誕 禮物俾小朋友，但其實你嘅小朋友可能一早就已經識穿真相！美國一項調查發現，8歲或以上嘅小朋友已經唔再相信世上有「真．聖誕 老人」；而一項芬蘭調查亦顯示，有92.5%嘅父母認為8歲以下嘅小朋友先會相信有「聖誕 老人」。
8歲起開始建立認知能力
一位美國心理學教授Thalia Goldstein指，3至4歲係小朋友開始相信聖誕老人存在嘅初階段，4至8歲更係信仰最強嘅時候，但踏入8歲起，小朋友開始發展認知能力，懂得分辨「可能」同「不可能」，因此對聖誕老人存在嘅信仰漸漸減弱。
調查研究中，更收集咗8歲小朋友對聖誕老人嘅提問，發現佢哋唔會再問「你身邊隻精靈係咩嚟？」之類比較天真無邪嘅問題，反而更多係試探性嘅問題，如「你點解可以穿過煙囪？」同「你點知我乖唔乖？」。
重新發掘 聖誕 節的意義
當小朋友發現一切都不過係假像嘅時候，難免會感到失望。呢個時候，家長應該同小朋友從另一個角度搵出節日嘅意義，例如將 聖誕 老人象徵成為為人奉獻嘅精神，從而培養小朋友樂於助人嘅品德，從另一角度搵出聖誕節嘅意義。
