人氣男子組合ERROR成員之一何啟華阿Dee，現年32歲，當初因參加《全民造星》被賞識而出道，出道後因拍攝VIUTV綜藝節目如《花姐ERROR遊》、《ERROR自肥企劃》而增加更多曝光機會，人氣爆升，現時除咗有被稱「VIUTV一哥」，更係唔少廣告商嘅新寵兒。不過阿Dee走紅前，亦與好多演藝人一樣奮鬥多年，歷經不少辛酸，由以前網絡創作團體「學舌鳥Mocking Jer」嘅網絡演員走到大銀幕。

中學畢業後專心學演戲及跳舞
為追夢三年靠車馬費維生

阿Dee就讀香港紅卍字會大埔卍慈中學，曾於訪問中提及，中學時已知自己非讀書材料，當時受中史老師啟發加入戲劇學會，自此便立志成為一位電影演員，中學畢業後於香港知專設計學院修讀電影及電視系，更有前往灣仔劇團學演戲。為咗增值自己，更向另一街舞師傅「孖八」學街舞，漸漸跳舞亦變成自己嘅專長之一，尤其擅長跳Popping及Locking，加入「香港男子鎖舞隊」與現為MIRROR成員嘅Lokman及Alton成為隊友。為咗平衡夢想與生活，阿Dee曾打過好多份工，做過洗地、傳銷、賣衫、侍應等。後來因為見到「天比高創作伙伴」招生，便主動應徵，加入後跟唔同前輩學跳舞學做戲，做足3年，靠車馬費維生。但由於做實習生人工唔高，家人亦曾勸過阿Dee搵返正職，不過阿Dee依然冇放棄，反而積極參加更多比賽，從比賽中獲得肯定，漸漸增加於舞團中嘅人氣，獲得更多工作機會。

明星成長 ｜ ERROR肥仔梁業190磅 從跳舞建立自信

受游學修激勵放手一搏參加《全民造星》

不過阿Dee卻曾於訪問中表示，雖然參加過好多比賽，但其實以往一直都冇好好把握機會。阿Dee曾參加內地人氣節目《這就是街舞》第一季，但因為當時隊友被淘汰而喪失鬥志，最終獨自Hea跳完成比賽，事後卻感到非常後悔，因比賽中並無全盡力而愧對自己，而呢一個教訓亦成為阿Dee往後參加《全民造星》獲得好評嘅關鍵。

後來一次機緣巧合下，阿Dee終有機會投身演戲事業，更與好友游學修（現為試當真老闆）創立「學舌鳥Mocking Jer」，因模仿天王劉德華入型入格嘅表演而一度紅爆網絡，同時更有開始參與電影拍攝如《鴨王》、《同囚》 。雖然曝光機會開始增加，但始終無法突破樽頸位，游學修曾於訪問中指阿Dee嘅缺點就係無法好好把握機會，就如當初扮華Dee紅爆後未能捉緊機會食住個勢向上爬。

阿Dee參加《全民造星》嘅其一因素係來自游學修嘅鼓勵，而游學修更為阿Dee訂立一個「當你出局時，要觀眾為你感到可惜」嘅目標，更開導阿Dee於初初參加《全民造星》時被受到嘅惡意批評。再加上阿Dee與跳舞出身嘅好友Lokman及Althon亦決定為夢想放手一搏，便一同決定參加《全民造星》，而阿Dee亦吸取咗之前嘅教訓，於比賽中盡顯所長，全程投入，把握每一個表演嘅機會，最終雖然無法入圍最後十強，卻嬴得觀眾及經理人花姐嘅喜愛，被邀請與同屆《全民造星》參加者193、肥仔及保錡組成男子組合ERROR。

明星成長 ｜ 保錡捱過低潮重拾方向 成ERROR第三人推出個人單曲《猥瑣》

從綜藝節目中累積人氣 獲得多個拍攝機會

雖然ERROR成團為阿Dee演藝事業跳躍一大步，但初時阿Dee卻直言並未如自己所料獲得許多拍攝電影電視嘅機會，直至參與各類型嘅VIUTV綜藝節目《花姐ERROR遊》、《ERROR自肥企劃》、《ERROR自救TV》並拼盡全力拍攝，讓節目大受歡迎，及得到更多觀眾認可，累積更多人氣後，便漸開始獲得更多參與拍攝演出嘅機會，事業亦開始上軌，由觀眾負評到被受喜愛，為咗追夢吃過不少苦頭，對回顧從前再對比一下而家嘅成功，阿Dee表示：「於現實社會中，付出未必與回報成正比，許多努力都未必能即時看到成果，但其實往往都只是差一點點。只要堅持下去，便會有所收成。就好像你的戶口只有$98結餘，你無法提款，但只要你好努力堅持尋找多$2，你就可以提取這$100。」

相信阿Dee嘅經歷能夠說服不少，只認為讀得書才能出人頭地嘅人，阿Dee曾於社交媒體中發表言論鼓勵一眾DSE考生，就過來人分享，表示讀書只適合三種人，分別係「仲未搵到自己想點嘅人」、「真係好想讀書嘅人」及「名門貴族嘅後人」，同時寄語考生，父母要學懂放手，鼓勵多相信及聆聽子女嘅意願，讓子女發展自己興趣。

敢發夢，又敢唔敢追夢？有想法，要實現就要想辦法！

我哋邀請咗不同界別嘅嘉賓，9月3日同大家分享升學及就職出路嘅資訊，並以專業角度分析生涯規劃嘅重要及實踐方法，同場更有演藝及運動界別嘅年青KOL以過來人身份同大家分享追夢嘅心路歷程，費用全免！

立即登記及出席講座仲可以拎走《生涯規劃自學手冊》實體書，快啲約埋朋友仔一齊報名啦！活動詳情 : https://bit.ly/3BTxPfP

明星成長 ｜ 謝安琪棄做老師追夢做歌手 感激媽媽信任不阻撓

相關文章
明星成長 ｜ 朱千雪於演藝事業黃金時期 為追夢重返校園成大律師
明星成長 ｜ 彭秀慧由舞台走到電影 40歲無懼質疑初嚐導演滋味
明星成長 ｜ P1X3L追夢過程公開 讀書最叻係Phoebus？

The post 明星成長 ｜ 何啟華阿Dee受游學修鼓勵參加《全民造星》為追夢洗地賣衫侍應都做過 appeared first on 新城教育+.

ERROR為香港男子組合，一直以搞笑騎尼形象示人，成員包括梁業（肥仔）、何啟華（阿Dee）、郭嘉駿（193）及吳保錡（保錡），全部均為ViuTV選秀節目《全民造星》參賽者，其中隊長肥仔雖然身形肥胖，但係身手靈活，跳舞技術相當了得，於《全民造星》時更係大熱之一。而原來肥仔之所以熱愛跳舞，全因當年跟媽媽去disco？

明星成長 ｜ 柳應廷街頭Busking兩年零收入從音樂創作中反思家人關係

跳舞時如發光般 自信十足打破傳統「肥仔」印象

肥仔中學讀慈幼英文學校，曾於訪問中透露自4歲已跟媽媽去DISCO，長大後見到雜誌有間跳舞課程嘅宣傳，便主動向媽媽提出想學跳舞，媽媽亦表示支持，更提出若想深造舞藝可以出錢支持肥仔到外國學習，而肥仔學習嘅更非傳統舞蹈如中國舞、芭蕾舞及拉丁舞，而係街舞，對於當時媽媽無條件嘅支持感到非常感激，更曾表示短期目標就係帶父母去旅行。

圖片來源 : IG@fatboyip

追夢過程總係滿途荊棘，而肥仔為咗追夢都曾經歷過經濟拮据嘅時候，更曾為未能賺錢養家而對父母感愧疚，不過肥仔自信且跳脫嘅表演力，最終於《全民造星》獲得一致好評，更令大眾對「肥仔」另眼相看，肥仔亦於節目中表示 : 「你估我唔到呀？我就做畀你睇」一跳舞身體就似會發光般，自信十足，相當吸睛，獲得網民大讚。

推出個人單曲憑歌寄意感激媽媽支持

最後肥仔於《全民造星》獲得第4名，更被邀請與同屆參賽者阿Dee、193及保錡組成男子組合ERROR，更有幸出SOLO歌，為答謝家人嘅支持，肥仔更於第3首SOLO歌《Dear MaMa》憑歌寄意，向媽媽表達感激之情。而呢首歌嘅意念係源於肥仔發嘅一個夢 : 「我仲有個哥哥做game designer，一家人一齊住，越大越多感觸…啲音樂好煽情…有幾晚發夢有親人離開咗，好真實，我坐喺床頭望住父母，好似未做過啲乜，間唔中都會發呢個夢，夢中我嚎哭喊到醒咗。如果我仲有第二隻歌，我係想寫畀我阿媽，我唔想畀自己後悔，我未必賺到好多錢，但一直好想帶佢哋去旅行，而家只係喺屋企食吓飯，想令佢哋安享晚年。」

明星成長 ｜ 邱士縉Stanley自小愛演戲曾參選香港先生 初期負評不斷曾自我懷疑

入行曾為跳舞導師 為EDAN師父

肥仔入行前經已為一名舞蹈員及跳舞導師，曾與不少藝人合作，如陳偉霆、側田及天堂鳥等，肥仔更係MIRROR成員Edan讀大學時嘅跳舞老師。Edan更大讚肥仔非常大愛，更爆肥仔冇收錢教自己跳舞，呢份施予非常難得，而肥仔則回應 : :「我曾聽一位前輩說，這個娛樂圈很需要傳承，傳承不可事事都計錢，而是無私奉獻。你寧願做一個出盡風頭，但其實別人不太喜歡你，或是躲在背後，教識對方所有，令對方默默感謝你，我會反思這問題，選擇做後者，我自知不是最靚仔或做男主角的人，點解不去做大家尊敬我的事，而且我自己也開心。」

相關文章:

明星成長 ｜ 楊樂文Lokman參加造星前曾想過轉行 全職教舞試過最低月入得4千
明星成長 ｜ Anson Lo DSE考獲23分 讀城大BBA為追夢退學做舞蹈者
明星成長 ｜ 陳卓賢以音樂抒發感受 求學時文武雙全為排球健將

The post 明星成長 ｜ ERROR肥仔梁業190磅 從跳舞建立自信 appeared first on 新城教育+.

新一代人氣組合，除咗有常見於各大型廣告嘅MIRROR及ERROR，其實仲有一隊由《全民造星II》入行嘅三位男子組合「P1X3L」，成員包括Phoebus吳啟洋、George歐鎮灝及Marco葉振弘，三位男生曝光機會愈來愈多，近日更有VIUTV劇集《I SWIM》。究竟佢哋嘅成長背景係點樣 ？即睇下文介紹！

Phoebus吳啟洋

圖片來源 : IG@phoebus_ng

Phoebus讀馬鞍山靈糧小學及青年會書院，畢業於香港理工大學土木工程系。Phoebus原本係一名運動健將，有10年手球經驗，更曾為港隊U16手球代表隊成員。讀大學期間已有簽約模特兒公司，兼職模特兒工作。參加《全民造星》前亦曾參加過FACE UStar大專學界校花校草選舉，更被FACE賦予「理大金秀賢」之稱，最後更成功奪得校草冠軍。

後來於2019年參加VIUTV舉辦嘅《全民造星II》，更取得全場冠軍，並於翌年與同為《全民造星II》參賽者嘅歐鎮灝及葉振弘組成男子組合P1X3L。對於入行，Phoebus曾於訪問中表示入行後嘅狀態係最自在，並表示：「讀大學時，人人都衝成績，我卻好像做一些自己不喜歡的事，很不開心，覺得其他人格格不入。但現在我一直做自己喜歡做的事，當然是最自在啦。」

明星成長 ｜ MIRROR 十二人學歷背景追夢過程大公開

馬鞍山靈糧小學
馬鞍山靈糧小學(Ma On Shan Ling Liang Primary School) 是位處於沙田區的一所資助小學。學校是一間基督教的男女校，創校於 1993年，校訓是「「信望愛」」，學校的上課時間是全日，教學語言是中文及英文，每年有測驗0次及考試3次。由於馬鞍山靈糧小學是資助小學，學生毋須繳付學費。

青年會書院
青年會書院（Chinese Y.M.C.A. College）是位於沙田區的一間資助中學，屬於男女校，該校辦學宗旨是學校以基督精神辦學，青年會書院屬於資助中學，毋須繳付學費。學校善用YMCA的國際網絡及資源，為學生提供廣闊的國際視野，於自然的語境下靈活運用英語，承辦國際賽　鍛煉學生 學校自2017年開始承辦「創意思維世界賽香港區賽」，該比賽是源自美國的國際級教育活動，啟發學生在創意思維、STEAM及創新科技方面的學習興趣。

George歐鎮灝

George畢業於寧波公學，入行前曾任兼職銷售員，並於2019年參加VIUTV舉辦嘅《全民造星II》獲得第四名。比賽期間George受盡批評，被指「得個樣」、「未夠班」，面對負面批評，George表示慢慢調節心態後，便逐漸變得冇咁在意，真正出道後George參與各類型嘅劇集拍攝，而近期於《I SWIM》中嘅演出，更獲得大量網民欣賞。

寧波公學
學校位於觀塘區，估計屬Band 2A–1C，是一間資助男女校，學校以中文為主要教學語言，秉承校訓「恆毅」精神，以「嚴謹與關懷」的辦學態度推行全人教育，讓學生愉快和積極地學習，培育學生良好的品格與積極進取的人生觀，實踐對社會、國家的關懷及責任的承擔，成為自律守法的公民，並作出回饋和貢獻。

明星成長 ｜ 柳應廷街頭Busking兩年零收入從音樂創作中反思家人關係

Marco 葉振弘

Marco母親袁偉青Greennie為重慶烤魚店老闆娘，以門外漢身份踏足飲食界，曾坐擁6間分店，係一位非常強嘅女強人媽媽。 Greennie曾於訪問中表示Marco中三時已向自己表示鍾意唱歌，於是Greennie便搵聲樂老師教導Marco，另外又幫Marco報讀聲樂課程，僅憑一年時間已考獲8級聲樂。

後來Marco對跳舞有興趣，於香港中文大學校友會聯會陳震夏中學畢業後便前往韓國做「練習生」學習跳舞，而媽媽Greennie更陪同Marco一同前往韓國，幫手安排生活住宿及入學事宜，並等待一切安頓好先離開。Greennie之所以如此上心，並全力支持Marco追夢，主要因為Marco升中時曾因要放棄學習10年多嘅跆拳道而與Greennie鬧交，更離家出走，令 Greennie自此改變心態，全力支持兒子做鍾意做嘅事，雖然Marco未能打入《全民造星II》10強，但卻被邀組成男子組合P1X3L，而獲得此消息時，Marco最想告知嘅就係一直陪住佢追夢嘅媽媽Greennie。

香港中文大學校友會聯會陳震夏中學
學校位於沙田區，是一間資助男女校，學校以中文為主要教學語言，學校以「博文約禮」為校訓，培養學生勤奮力學，敦品勵行；敢於創新，勇於承擔；獨立思考，明辨是非；關心社會，樂於服務；對國家民族有使命感。

明星成長 ｜ 姜濤對中學回憶感遺憾 望30歲似發哥過生活

相關文章:

明星成長 ｜ 楊樂文Lokman參加造星前曾想過轉行 全職教舞試過最低月入得4千
明星成長 ｜ Anson Lo DSE考獲23分 讀城大BBA為追夢退學做舞蹈者
明星成長 ｜ 張天賦 參加選秀追夢全因唔想俾人「睇死」

The post 明星成長 ｜ P1X3L追夢過程公開 讀書最叻係Phoebus？ appeared first on 新城教育+.

MIRROR 十二人透過 <<全民造星>>入行，全部學歷均不同，更有啲係高材生，為咗夢想放棄穩定收入嘅行業，升學至畢業都曾經歷過迷惘嘅時候，為咗突破自己，參加選秀比賽，最終夢想成真組成MIRROR，登上紅館展開十場演唱會，紅遍香港！立即一齊睇下MIRROR全員嘅追夢背景！

呂爵安 Edan

圖片來源 : IG@edanlui

中學：可風中學
DSE 成績 ：25分
大學：香港大學工商管理學學士（資訊系統）

呂爵安Edan唔只有8級鋼琴嘅音樂技藝、豐富嘅喜劇細胞，更係港大學士畢業生，被稱為MIRROR全能才子。Edan訪問中曾透露，由於佢對電腦資訊本身冇乜概念，入到大學讀IT讀起上嚟非常辛苦，編程考試更試過唔合格，自稱能成功畢業實在非常難得。Edan話如再揀一次，會修讀社工，更提醒DSE考生要按興趣選科

柳應廷 Jer

中學：天主教伍華中學
大專：香港浸會大學國際學院文學副學士（傳理學）

阿Jer大學畢業後，將全副心機擺入音樂，喺香港街頭表演Busking，幾乎兩年接近零收入，為維持生計，轉做娛樂記者，但始終娛樂主播與做歌手係截然不同嘅工作，阿Jer並不甘願當一個社會齒輪，心裡最想嘅始終係透過音樂傳遞訊息，為生活帶嚟一絲轉變。

明星成長 ｜ 柳應廷街頭Busking兩年零收入從音樂創作中反思家人關係

陳卓賢 Ian

中學：長沙灣天主教英文中學
大學：香港城市大學公共政策與政治系學士

Ian中學就讀長沙灣天主教英文中學，屬於區內名校，學術成績表現優秀之外，體育發展亦相對突出，曾連續16屆獲得「香港天主教教區中學聯校運動會」男子全場總冠軍！而Ian身為學校其中一員，運動表現當然絕不遜色，中學時更一度獲得全港學界精英排球比賽中「最佳二傳」。中學畢業後更入讀城市大學，修讀公共政策與政治系，當時更代表城市大學參加香港大專體育協會男子排球賽殺入總決賽，連續兩年衛冕冠軍！Ian期後亦成為香港男子排球代表隊及南華排球隊甲一隊。但因為Ian決心發展歌唱事業，終放棄運動員發展，專心一意投入演藝事業。

邱士縉 Stanley

中學：沙田區的保良局胡忠中學
大學：香港城市大學

Stanley大學就讀城市大學，跟Anson Lo一樣同為舞蹈學會成員，畢業後亦曾成為專業舞蹈老師，亦身兼舞者，為不少天王巨星伴過舞如郭富城、林憶蓮等，出席過大大小小嘅舞台表演，後來想突破自己，將發展領域拓寬而有意參加不同嘅比賽入行成為藝人。由於鍾意睇電視，由細到大都希望入行成為演員，曾報讀過4年演藝班，更有參加過香港先生選舉，可惜因為停辦，最後去咗參加《全民造星》，最後更打入十強，成為MIRROR成員之一，一炮而紅。

明星成長 ｜ 邱士縉Stanley自小愛演戲曾參選香港先生 初期負評不斷曾自我懷疑

陳瑞輝  Frankie

中學：中華基金中學
大學：香港理工大學酒店業管理學士

雖然讀酒店，但Frankie醉心跳舞，畢業後並無想過做文職，一開始就已鎖定舞蹈員為目標。不過Frankie 成為舞蹈員期間，並曾有低潮期，未知應該向做Show或做導師嘅方向發展，最後因為朋友肥仔（梁業 – ERROR成員）及 AK（江𤒹生– MIRROR成員）等都報名參加《全民造星》，便決定一齊參加，把握機會挑戰自己。

明星成長 ｜ 陳瑞輝Frankie出道４年憑《IT狗》入屋 曾迷失於MIRROR與自我之間

盧瀚霆  Anson Lo

中學：保良局羅傑承（一九八三）中學
DSE 成績：23分
大學：城市大學工商管理學士(商業分析)

Anson Lo 於DSE取得23分唔錯嘅成績，其中中文科更取得5*佳績，期後入讀城市大學工商管理學士(商業分析)。入到大學後，Anson Lo加入舞蹈學會，從此愛上跳舞，更以跳舞為目標，為咗追夢，不惜放棄大學學位，開始去做伴舞及排舞老師。而Anson Lo曾於訪問中透露當時並冇跟父母商量過，父母亦非常擔心，而當時初入職時亦只賺得$1400月薪，努力接近半年先有過萬收入。

楊樂文 Lokman

中學：新會商會陳白沙紀念中學

Lokman自小熱愛跳舞，更曾於小學紀念冊上於「我的夢想」一欄中填上舞蹈員。Lokman當初因為見到別人跳街舞時嘅英姿而對跳舞產生興趣，升上中一後更到社區中心學跳舞，一學便愛上，中二時亦有組團周圍表演，後來專注學習機械舞及鎖舞，中五畢業後便立志成為一個專業舞蹈員，於訪問中曾說 : 「舞蹈能讓我全情投入，肯定自己，是唯一讓我感到快樂的事。」

邱傲然 Tiger

中學：新會商會陳白沙紀念中學

除咗拉丁舞，Tiger更識得武術、彈吉他、打鼓同彈琴，閒時更會自彈自唱！小學時期更加入培基武術學會，曾經於「全港公開新秀武術錦標賽」男子小學組初級南拳項目奪冠軍，並且於其他武術賽奪獎。中學畢業後入讀香港浸會大學電影學院，並曾為MIRROR第三首單曲《破鏡》MV執導，可見其藝術天分超高！

明星成長 ｜ 拉丁舞王子邱傲然以「下弦」自稱出席鮮浪潮頒獎禮

姜濤

中學：鄧肇堅維多利亞官立中學
高中學校 : 青年學院（邱子文）運動教練文憑課程

姜濤中學時讀書成績麻麻，中三就轉學去青年學院（邱子文）讀文憑，但卻因為對表演有天份及興趣，參加《全民造星》並成為受一眾年青人愛戴嘅偶像，除咗個人努力，背後亦有賴家人開明嘅態度，及無限嘅支持及體諒。

明星成長 ｜ 姜濤對中學回憶感遺憾 望30歲似發哥過生活

江𤒹生 AK

中學：聖公會李炳中學

AK中學畢業後與娛樂公司簽約，被送到韓國成為練習生接受培訓。雖然唔係讀名校出身，又冇好驕人嘅學術成績，但品性好，又努力增值自己，而家嘅事業亦已上軌道，成為受不少年青人欣賞嘅偶像

王智德 Alton

中學：賽馬會體藝中學
大學：城市大學電子物流及科技管理學

Alton 曾嘆自己入錯科，曾於訪問中表示 : 「讀咗唔太稱心如意嘅科目，唔太稱心如意咁畢業」佢嘅夢想係可以開演唱會，所以做過舞蹈員又做過健身教練，以舞蹈員爭取表演機會同時，亦Keep住身體操得非常Fit！後來更憑着堅持同實力，加入人氣男團MIRROR，成功以MIRROR身份舉辦演唱會！

李駿傑 Jeremy

中學：明愛元朗陳震夏中學

Jeremy自小就搵到將來嘅目標，6歲就立志成為歌手，參加過大大小小嘅歌唱節目，亦報名參加過韓國偶像公司嘅練習生選拔，直至遇到VIUTV嘅《全民造星》，得到賞識並正式成為歌手。

相關文章:

明星成長 ｜ 楊樂文Lokman參加造星前曾想過轉行 全職教舞試過最低月入得4千
明星成長 ｜ Anson Lo DSE考獲23分 讀城大BBA為追夢退學做舞蹈者
明星成長 ｜ 陳卓賢以音樂抒發感受 求學時文武雙全為排球健將

The post 明星成長 ｜ MIRROR 十二人學歷背景追夢過程大公開 appeared first on 新城教育+.

MIRROR演唱會開始咗兩日，經已不斷流出表演時嘅小意外，前晚MIRROR其中一位成員陳瑞輝（Frankie）站於台上講嘢時，一不小心踏空跌落台受傷，當場引起Fans尖叫，幸好後來Frankie表示只係皮外傷無需擔心。不過相比起一場小意外，Frankie前晚於台上分享嘅感受確係非常鼓舞。MIRROR成軍4年，當中不少成員都大紅大紫，但Frankie則被外界視為「隱形人」，曝光機會比其他成員低，曾迷失於自我與團體之中，幸好最後心態得已調整，更憑《IT狗》Never一角讓觀眾留下深刻印象，重拾自信。

明星成長 ｜ 柳應廷街頭Busking兩年零收入從音樂創作中反思家人關係

畢業後鎖定舞蹈員為目標

圖片來源 : IG@frankie729

Frankie就讀聖若瑟小學，並入讀Band1中華基金中學，大學畢業於香港理工大學酒店業管理學士。雖然讀酒店，但Frankie醉心跳舞，畢業後並無想過做文職，一開始就已鎖定舞蹈員為目標。不過Frankie 成為舞蹈員期間，並曾有低潮期，未知應該向做Show或做導師嘅方向發展，最後因為朋友肥仔（梁業 – ERROR成員）及 AK（江𤒹生– MIRROR成員）等都報名參加《全民造星》，便決定一齊參加，把握機會挑戰自己。雖然Frankie後來於30強止步，但因為跳得又睇得，因此被邀加入MIRROR，而MIRROR亦於近幾年紅遍全港，最近更展開十場嘅紅館演唱會。

backup dancer出身不慣望Cam

雖然MIRROR出名，不過當中亦有部分成員曝光機會少，因而被稱為「下弦」，Frankie便係其中一人。Frankie於團隊中比較內斂少說話，亦比較被動，但其實其中原因係受backup dancer出身嘅背景所影響，Frankie曾於訪問中表示作為backup dancer一向唔期望被Cam影，表演時亦會暗咐「唔好望我」，所以對於成為幕前後經常要對Cam大感不慣，並指想成為真正嘅幕前先要戒甩作為backup dancer嘅諗法。加上Frankie表示入行前一直係一個欠缺信心嘅人，自從加入MIRROR後方向及目標變得比以前明確，自信心都比從前多，而個人方面都有所轉變。不過始終成員之中，每個人嘅能力唔同，步伐唔一樣，所以走得比較慢嘅Frankie亦會因為自己嘅努力未有成果及發展比其他成員慢而感到唔開心。

明星成長 ｜ 邱士縉Stanley自小愛演戲曾參選香港先生 初期負評不斷曾自我懷疑

演唱會上發表隱形人論受全場鼓舞

前晚Frankie就於舞台上發表入行接近4年嘅心聲 ，表示曾一度迷失自我：「我今日要講嘅係MIRROR嘅隱形人係如何形成，隱形人並非浪得虛名，佢好似一個黑洞咁不斷將人吸入去。就似訪問、綜藝節目等，只要你講慢一秒，你嘅說話就會被隊友搶咗嚟講，都唔知跟到邊，跟住又會俾人話冇講嘢，真係好難。我見過啲好嘅Comment，佢哋讚Frankie專業︰『見到佢成個訪問都喺到笑 』我真係多謝你。既然係講MIRROR嘅隱形人，咁我講返MIRROR！出道時好有抱負，同其他人一樣，我好想影響其他人，好想為呢個世界有啲貢獻，好似好勁，但慢慢我嘅目標冇啦啦變咗做MIRROR，正常啲人都知道冇可能。團隊目標同個人目標係唔一樣，所以跟住呢個目標行，我愈行愈迷失，愈冇咗自己。」「MIRROR愈嚟愈好，隊友當然好好，愈嚟愈多嘢做 ，我自己喺屋企就望住四幅牆，等運到 ！再加埋疫情爆發，我窮到要問人借錢過生活，我愈嚟愈冇自信，開始收埋自己，點解我要嘥咁多時間，去擔心生活，而唔係點樣去做好自己？不過呢個世界好有趣，疫症轉好咗，我終於有工作。我有《調教你MIRROR》、第二次MIRROR Concert同《IT狗》內嘅Never，我好感恩，我諗唔到到原來Never都可以影響到人，悲觀嘅樂觀係佢嘅價值觀，亦成為咗我當時嘅價值觀，佢教識我點樣去度過呢個嘅低谷，苦中作樂。我見到拍劇呢條路有光，好似呢盞燈一樣好耀眼，我覺得可以啟發到人，今年我對自己有返希望。」

Frankie於上年就《IT狗》Never一角嘅表現，讓觀眾留下深下印象，更被讚演得好，角色亦討好，為咗演好角色，Frankie除咗向有份參演劇集嘅其他隊友Lokman同Stanley意見外，更專誠上戲劇課程，而當中Never角色嘅價值觀「樂觀地悲觀，是我的價值觀」更成為Frankie度過人生低潮嘅信念。

相關文章:

明星成長 ｜ 楊樂文Lokman參加造星前曾想過轉行 全職教舞試過最低月入得4千
明星成長 ｜ Anson Lo DSE考獲23分 讀城大BBA為追夢退學做舞蹈者
明星成長 ｜ 陳卓賢以音樂抒發感受 求學時文武雙全為排球健將

The post 明星成長 ｜ 陳瑞輝Frankie出道４年憑《IT狗》入屋 曾迷失於MIRROR與自我之間 appeared first on 新城教育+.