明星成長｜彭秀慧由舞台走到電影 40歲無懼質疑初嚐導演滋味

最近電影《阿媽有咗第二個》正式上映，除咗演員鼎盛，更係由資深舞台劇演員出身兼曾勇奪香港電影金像獎新晉導演嘅彭秀慧執導。彭秀慧早年首次執導《29+1》，將舞台劇帶上大銀幕，獲得非常好口碑，更引起不少將踏入30歲嘅女士共鳴。彭秀慧兼顧編劇、導演及演員於一身，絕對係事業性女強人，不過背後亦曾經歷過懷疑自己嘅時候。

除演戲仍有多方面興趣
曾兩度提名舞台劇獎最佳女主角

彭秀慧於演藝學院出身，主修表演，曾於訪問中坦言自己選擇學科時，從來冇擔心過搵唔到食，因為自己對不少行業都有興趣，若然畢業後冇劇團聘請，就考慮從事其他事業。彭秀慧曾提起，細個時喺影音公司做暑假工，負責推銷MD機，被公司高層讚賞更被推薦成司儀，表示人有多種可能，自己亦對新事物唔抗拒，因從每一個範疇學到嘅知識總能運用於另一個範疇上。

圖片來源 : IG@kearenpang

不過畢業後，彭秀慧很快便加入咗中英劇團成為全職演員，演出多套戲劇，並曾兩度獲提名香港戲劇協會舞台劇獎最佳女主角獎，除咗作為一名舞台劇演員，彭秀慧更有為中英劇團音樂劇《雪夜頌》編舞。後來彭秀慧離開劇團，因獲得香港戲劇協會獎學金，有機會到巴黎研習默劇及形體劇場，隻身打滾於不同劇場及各個藝術領域上，後來更開始創作不少自編自導自演嘅作品，大部分都係獨腳戲，無論幕前定幕後都累積到豐富嘅經驗。

明星成長｜盤點五所星二代就讀的國際學校

從舞台走到電影為《29+1》執導

直至2005年，彭秀慧創作舞台作品《29+1》，極受歡迎，曾演出多次公演，累積演出約90多場，相隔多年，正值踏入40歲之時，因受到周秀娜嘅經理人鼓勵，決心將《29+1》拍成電影並為其執導。至於《29+1》嘅誕生，某程度上都係因為彭秀慧想証明自己，曾坦言創作劇本時，會不斷思考着「點解我被人睇死？」、「我做緊嘅嘢有冇意義？」等問題。而《29+1》舞台劇嘅多次重演，亦曾受得別人質疑，期間彭秀慧亦曾因為咁而自我懷疑，直至首次擔任導演時，才明白到全靠從前累積嘅演出經驗才能成就今天成為導演嘅自己：「當我曾經質疑自己為什麼要繼續做下去的時候，當聽到不同的聲音，有些人可能不予理會，繼續我行我素；而對於我來說，每一次我都會心虛，質疑自己，開始擔心⋯⋯」

雖然彭秀慧拍攝《29+1》前，早已接觸過電影，曾創作《伊莎貝拉》劇本，由彭浩翔執導。不過始終由舞台劇真正走入電影圈，依然係另一個不同領域嘅世界，能力上亦曾受到別人嘅質疑，不過由於彭秀慧相信自己，總能從掙扎之中找回本意，電影最終如期誕生，彭秀慧曾說：「盡力提醒自己，做到自己要做的事，才是最重要的。」《29+1》上映後好評如潮，唔只為彭秀慧帶來第一個電影獎項，更帶紅咗劇中兩位女主角，欣宜及周秀娜，而周秀娜甚至憑電影成功轉型。

明星成長｜湯令山Gareth受媽媽影響自小迷上音樂海外留學拓展音樂領域

從獨立生活中培養決斷力並獲取滿足感

彭秀慧能夠擁有導演嘅決斷力，某程度上與其獨居生活有關。彭秀慧曾於訪問中表示，當只有自己可以照顧自己時，先會發現許多事情都係得來不易，亦會令自己更加懂得人生嘅運作，並掌握生活嘅主動性，承擔自己行為嘅一切結果，雖然責任大咗，但同時會更享受獨居嘅時光，因為所有事情都係自己一手建立，能夠獨立為自己創造生活，可從中獲得滿滿嘅幸福感。