《香港澳門米芝蓮2023》早前揭曉，成為大小吃貨的指南。有不少上榜餐廳適合小朋友，而且價錢唔算貴，家長們可以一家大小去享受星級飲食，或者平民美食都有好多選擇，以下精選10間上榜食肆，大家可以暑假周圍搵美食。
1.船記
「一盅兩件」係唔少家庭放假指定活動，主打手工中菜同手工點心嘅船記喺2021年底開業，今年已經打入米芝蓮榜，到底有咩咁出色？
船記提供點心、燒味和懷舊手工菜等經典粵菜，由點心師傅擁有逾30年經驗，點心每日新鮮製造，即叫即蒸。必食推介包括晶瑩剔透的韭黃鮮蝦腸、選用上乘脢頭肉製作，肥瘦得宜嘅和哥叉燒、自家製冰燒三層肉，外皮金黃香脆，腩肉層次分明！
其中和哥叉燒$98/6件，比市面燒臘店貴一截，但厚切半肥瘦叉燒軟腍黏牙，好考師傅手藝和刀工，所以價錢貴仍吸引大批食客。午市套餐(4位用)為$788，可嘆到燉湯、3款點心和自選小菜及飯餸4款，以灣仔這個地段來說，性價比算不錯。
地址：香港灣仔船街7號寶業大廈地下
2.文記車仔麵
車仔麵係香港傳統麵食，深水埗嘅文記車仔麵有3家分店，鋪頭經常大排長龍，超受歡迎，難怪今年再度打入米芝蓮推介榜。鋪頭提供14款麵底同超過60款配料，推介美食有：柱侯牛腩、瑞士汁雞翼、滷水豬大腸、手打魚肉、蠔皇小花菇、玻璃辣魷魚、南乳豬手、自製韭菜餃等，大人小朋友都啱食，仲有獨門特製辣椒醬，令人一試上癮！最重要係食物價錢平，每款配料$10-$15不等。
地址：深水埗福榮街121號
3.阿純山東餃子
香港都食到正宗北方風味！位於太子嘅阿純山東餃子再度登上米芝蓮推介，強調正宗手擀皮餃子，10多款餃子皮薄多餡，麵食選用無梘水手打麵，山東手撕雞和家鄉餡餅亦係鎮店招牌菜。
阿純山東餃子於2011年開業，老闆王宏純有30多年做餃子經驗，餃子全以人手即日包製，拒用機器包餃，而且老闆堅持手擀皮；餡料選用山東入口調味料，夠地道：高峰期每日賣二千隻！餃子以京葱羊肉餃、薺菜鮮肉餃最受歡迎，店家秘製數款青島海鮮餃，如墨魚餃和馬鮫魚餃，令人驚喜。店內提供超過十款餃子，可以淨食或拌麵。
必食推介仲有拔絲地瓜/山藥、山東燒雞、各款家鄉餡餅等，大家仲可以試下魯菜同北方麵食，如山東炸醬麵、青島香腸、酸辣湯、烤羊腿、窩窩頭等，價錢大眾化，大人小朋友都啱食。
另外，店內綠色木窗框和木製傢具帶傳統味道，很有老香港感覺。
地址：太子荔枝角道60號
4.九記牛腩
牛腩麵可說是香港地道美食。開業於上世紀30年代嘅九記名氣極大，連周潤發、金城武、陳奕迅、梁朝偉夫婦等大明星都有幫襯，難怪每朝店舖還未開舖，門外總有人龍，排半小時係基本。
必食推介有清湯牛腩、咖喱牛腩，配上超級掛湯嘅伊麵，味道一流。湯底以中藥配方製成，加上多種香料煮成，絕無味精。牛腩軟熟，牛筋軟滑，河粉爽滑，令九記登上米芝蓮推介榜。由於九記店鋪面積不大，裝潢同一般麵店差不多，客人好多時同其他人搭枱。
地址：香港中環歌賦街21號
5.丁爸食府
牛池灣小巷有一個隱世小店獲得米芝蓮推介，呢間小店叫丁爸食府，由人稱丁爸嘅台灣人丁勤之主理。丁爸食府主要提供台式小吃，包括大腸麵線、蚵仔麵線、韭菜盒子、鍋貼、滷肉飯、古早味紅茶等等，十分地道，而且價格平民化，$50以下大把選擇。丁爸堅持所有食物原汁原味，唔落味精、防腐劑和色素，譬如蛋餅的麵團，就用傳統的做法，混合天然老麵種，所以麵餅很鬆化。店內八成食材從台灣進口，包括飛魚、豆瓣醬、油蔥酥、麵線等，醬料由丁爸親自調配。用心製作，難怪開店不久，已獲米芝蓮推介。
丁爸以前喺台灣當兵21年，退役後把當年老兵教佢嘅食譜開店，先在台灣開了熱炒店，來香後開始做私人廚師和菜館擔任廚師。2021年，佢見台灣鄉親在疫情期間飽受思鄉之苦，於是開設台灣小食店，希望台灣人有一個落腳點。
地址：九龍牛池灣貴池徑2號
6.西關老祖
今年新入選米芝蓮推介名單嘅西關老祖，係一間只提供經典中西自家製嘅店鋪，主打懷舊及創新小食，價錢十分平，簡直係糧尾恩物。
主廚推介手工製作嘅西關瀨粉配豬油渣，瀨粉沿襲廣東西關古法，瀨粉配上蝦米、冬菇、豬油渣碎，一碗只係$26，難怪每日賣過百碗。$50以下大把選擇，例如100%香港製造炸粽配西班牙杜洛克豬腩、極黑·黑叉燒飯，四十幾蚊就食到由西班牙黑毛豬腩炮製而成嘅黑叉燒，仲有爆炒XO醬蘿蔔糕，由特選本地老牌潘記香滑腸粉配上老祖秘傳XO醬，超級惹味。
負責人曾在訪問表示，入圍米芝蓮推介榜是對得住當年教佢哋做小食的老師傅，亦很高興廚藝備受肯定。
地址：九龍佐敦文苑街18B
7.魚事者
好多小朋友都鍾意食魚、魚蛋，位於北角嘅魚事者就提供以魚為主題嘅創新小食，將「魚蛋」變出無限可能。招牌菜包括有以魚皮模仿墨西哥玉米片，配搭自製牛油果醬和番茄莎莎醬，味道豐富；泰式蝦頭油炸蝦球魚麵撈、炸魚無薯條充滿香氣；晚市才供應的魚米粒粒扮意大利飯，彈牙好食，難怪今年首次打入米芝蓮榜。
魚事者老闆曾對傳媒表示，因為當年留學美國懷念住香港「篤魚蛋」嘅滋味，返港後就以「魚」為題開店，以魚肉製作不同玩味小食。小食價錢大眾化，例如魚麵撈大約$65-72不等、小食幾十蚊有找。小店仲會經常推出限定小食，充滿驚喜！
地址：北角宏安道14-28號威德閣地下14號舖
8.方太糕品舖
呢間街頭小食店 「方太糕品舖」都係榮獲米芝蓮推介！人手蒸製嘅中式糕點，聽見都流口水！當中包括缽仔糕、白糖糕、芝麻卷 及椰汁千層糕等。店舖之前於訪問中，提到糕點用糖量較少，大家唔怕罪惡，亦唔怕影響小朋友健康!
店舖最賣得嘅就係缽仔糕同王牌芝麻卷，客人食過都讚芝麻卷爽口彈牙，仲有啖啖嘅香濃芝麻味， 而缽仔糕蒸得通透，食落滑嘟嘟，亦好有咬感！
除咗以上王牌糕點，店舖仲有十多糕點種類，包括新推出嘅椰汁綠茶糕、仲有杞子桂花糕及椰汁馬豆糕。舖頭下午就開始有人龍出現架啦，如果想食真係要早少少去排隊！
地址：佐敦廟街198號
9.逸東軒(米芝蓮一星)
連續第七年獲得米芝蓮一星的逸東軒，現正推出$38起堂食午市手工點心，有超過30款點心選擇，必食推介包括合桃叉燒酥、蘿蔔絲酥餅及原隻鮑魚雞粒酥等，夠香口啱小朋友，仲可以嘆多款得獎招牌菜，如明爐蜜汁叉燒、脆皮燒腩仔、二弄玻璃蝦球等。
地址：佐敦彌敦道380號逸東酒店地庫2樓
