DSE文憑試放榜在即，各位應屆考生未來想向哪方面發展？
小薯茄為代表的人氣網上短片製作團隊，近年來愈發走紅，拍網片成為不少年青人嘅愛好，亦有愈來愈多年青人加入網絡界成為Youtuber，因此我哋特意邀請咗《小薯茄》幕前成員之一「朱Mic」，分享當年DSE放榜嘅心路歷程，並就過來人身份將成功入行嘅貼士傳授俾各位應屆DSE考生！
朱Mic今集將為大家首度公開小薯茄招募全過程及被選中原因，立即去片！拉落啲仲可以睇埋文字足本版。
想知朱MIC當年放榜成績？即刻重溫Part 1！
朱Mic訪問文字足本版
問：小薯茄招募過程有幾長？
答：整個過程差唔多要7個月，都算係一個幾長嘅時間，因為嗰陣係2021年嘅1月，即係我Year 4嘅SEM尾，即將進入最後一個SEM，當時見到小薯茄招募，我就Send自己嘅profoilo，報咗名先，過咗兩個月我先收到通知話有First Round Interview，其實我本身以為自己已經俾人Screen走咗，但結果冇俾人Screen走，都覺得幾好彩。
問 : 整過招募過程係點進行？
答：第一次去到面試，好簡單咁講下自己嘅information，講下點解自己想加入小薯茄，仲有一個小小嘅試鏡，係一個小薯茄好典型對住鏡頭講嘢嘅系列，例如係之前童童拍過對住鏡頭講自己係一個好矮嘅女仔，試一試嗰種劇本，係獨腳嘅，基本上第一次嘅試鏡就係咁。
然後好似又過咗兩個月，又係一個好長嘅時候，感覺上每一次都以為自己會俾人Screen走咗咁。然後經理人KIKO好好咁打俾我話： 『唔好意思呀，我哋搞緊市集，我哋好忙，但想同你講，你有Second Round啦，但你要等我一陣』成件事好得意，佢好似俾一個安心我咁。
然後第2次面試，佢哋就再問我一啲更深入嘅問題，例如係如果我真係入到，具體地我會點樣做，我會想達到咩成就…同我傾後續少少嘅嘢。同埋都有試鏡嘅部分，搵咗阿J陪我Cast一個有對戲嘅劇本，我哋互相換咗角色一次，呢個就係第2次嘅Casting。第2次我都幾驚，因為我同人對戲嘅經驗少，完咗Casting我都覺得自己有好多地方做得唔夠好，覺得如果早啲知個劇本我一定會做得好啲，好多呢種諗法…
想知朱MIC當年放榜成績？即刻重溫Part 1！
但最後都係平常心，如果真係有下次機會，我一定會做得更好。然後再接到通知有第三次，嗰陣其實由1月交Form去到第3次已經係6月，心諗其實Total會有幾多次呢？但佢哋就同我講第3次唔係好使準備，我上嚟就可以。我上去時，都心諗佢哋會唔會又問我問題，但我該準備嘅嘢應該都準備咗啦喎，我唔知仲有咩可以答佢喎…
最後上到去都好得意，老世高Ling坐咗喺度，個Setting完全同之前唔同晒！之前係一啲interview嘅Setting，好Formal，就係你坐喺度，然後3個interviewer望住你，然後第3次係坐喺張飯枱度，佢哋喺度食飯，問我食咗嘢未，我話食咗，但其實我未食，但我好驚，所以話食咗
然後佢就透露話佢哋已經揀咗我，嗰陣其實我好唔敢相信。佢用一個好平淡嘅方式，同你食餐飯傾下偈，話： 『你嚟緊就係咁架啦』之後再約下嚟緊點樣簽啲嘢，嚟緊點樣實行呢件事。我都好似係第一次公開成個過程，呢個就係我加入小薯茄嘅過程。
問 : 知唔知有幾多個競爭對手？
答：大約好似係一千個人
問 : 參加小薯茄招募前做咗咩準備 ？
答：我本身都做咗好多準備，因為我本身有拍Youtube，但我好少拍一啲搞笑嘅製作，我多數拍Vlog，拍下啲 jump cover去紀錄一下自己嘅生活，但我就覺得咁短時間我都好難表現到自己幽默嗰一Part，咁不如我喺profoilo嘅自我介紹片段上Show多啲我識嘅嘢，例如我show自己識打鼓、識彈結他，盡量Show到愈多愈好，盡量令佢哋記得我，我希望盡量喺profoilo度Show到自己嘅特質，呢個係我做嘅準備
問 : 被小薯茄揀中嘅原因係？
答：最後成功咗，我都有諗過會唔會係我啲演藝都幾好，唔通佢又覺得我搞笑？但原來唔係，高Ling話佢見到我有啲特質，見到我有對網絡嘅觸覺，但未夠強，仲需要調整。可能咁講，佢覺得我可能有潛力調整做一位適合喺網絡出現嘅人
