天氣轉涼，帶小朋友出外戶外放電唔怕曬親唔怕熱親，仲可以郁動下手手腳腳，跑跑跳跳舒展筋骨！今次集合咗5個媽媽私心推介嘅戶外兒童遊樂場俾大家，全部都係免費，而且每個遊樂場都有主題，邊玩邊學習，遊戲措施設計超有心思，包保大人細路都玩到樂而忘返！
(一) 屯門公園 – 爬蟲館及共融遊樂場
今次豬仔包媽媽帶豬仔包去呢個爬蟲館位於屯門公園裡面，由「百田樂園室內遊樂場」行過去都係10分鐘，超方便！
未入館前，館外已有大量爬蟲類動物嘅模型，入去玩之前已經可以打卡！原先豬仔包媽媽都以為係睇標本，但入到發現原來大部分爬蟲類動物都係真！
最吸引豬仔包同其他小朋友嘅，係兩隻盾臂龜，因為盾臂龜非常大隻，仲要咁啱見到佢哋龜速咁行嚟行去，小朋友都睇得好開心，仲係咁同龜龜打招呼。
除咗大龜之外，另外仲有蟒蛇及蜥蜴等爬蟲類動物
最深刻嘅係游緊水嘅豬鼻龜，超級可愛！
參觀完之後，如果一開始冇打到卡，出返門口可以再影過，小朋友們表情動作多多，同啲展品好有互動，仲開心過喺展館睇爬蟲動物添！
打完卡就去屯門共融公園出發！屯門公園共融遊樂場係香港首個以「水」和「沙」為設計主題嘅公園，由參加咗 「智樂小小遊樂場專員培育計劃」嘅小朋友幫手構思
當中更有一啲康樂設施係為傷殘兒童而設，例如為坐輪椅兒童而設嘅滾筒式滑梯，為聽障兒童而設嘅不鏽鋼滑梯等等，等特殊兒童都可以享受樂園嘅快樂！
豬仔包一去到共融遊樂場，第一時間仍然係衝去玩滑梯，不過當佢玩完吊橋之後都驚到出咗一身汗…
另外，共融遊樂場仲有玩水區，不過而家天氣有啲涼，建議各位家長最好因應天氣而決定俾唔俾朋友去玩，如果要玩最好準備後備衣服俾小朋友替換，可以嘅話最好帶埋玩水嘅器具，呢個遊樂場真係玩全日都唔會悶，仲要免費，真係可以放足電先走！
室外玩到熱，都又可以去返「 爬蟲館」涼吓冷氣睇吓昆蟲，絕對係親子玩樂嘅好地方！
共融兒童遊樂場
開放時間：每日7:00 – 11:00（包括公眾假期）； 每星期一 上午7:00 – 13:00暫停開放（如星期一為公眾假期，保養工作將順延至下一個工作天進行)
查詢電話：2451 1144
交通：屯門西鐵站B出口經屯門公園，行約10分鐘
爬蟲館
開放時間：每日9:00 – 18:00 （包括公眾假期）
費用：免費
週末好去處 ｜環保概念之旅免費遊 4D電影+玩AR/VR遊戲+導覽
(二) 恐龍公園坪石遊樂場
呢個恐龍公園要行大斜路或樓梯上去，而家天氣較涼，唔使擔心行到頭都暈！其實 「恐龍公園 」係 「坪石遊樂場 」嘅兒童設施，以遠古恐龍時代為主題，附近有公眾停車場，揸車去都好方便。一去到呢個兒童遊樂場嘅入口，就經已望到有大大隻恐龍牙張開口好似準備食人落肚咁，完全唔使擔心會搵唔到！
呢個遊樂場有好多恐龍嘅佈置，色彩繽紛嘅恐龍蛋化石、恐龍骨、大大嘅恐龍頭、恐龍腳印同恐龍山洞等，不過豬仔包望咗兩眼，已經俾其他遊樂設施吸引住…
呢個遊樂場面積好大，分成兩邊，非常多滑梯，亦有鞦韆、搖搖船、攀爬架等感官玩樂設施。最特別係城堡滑梯有個升降機，可以俾小朋友「搭落樓」，睇落相當好玩又刺激，不過豬仔包身型細小，驚佢扶唔實跌落地，所以唔敢俾佢玩…
由於當日人流唔多，豬仔包兩邊係咁走，超級放電，可惜玩咗一輪，突然落雨，唯有提早結束呢次恐龍之旅…臨離開前，發現除咗揸車之外，仲有一架82號小巴可以直達，唔揸車都方便前往，唔駛行斜路同長樓梯～
地點：九龍牛池灣平山彩石里
開放時間：06:00 – 23:00
(三) 沙田交通安全公園
如果你嘅小朋友都有一部「戰車」，可以試下去沙田交通安全公園體驗吓！今次豬仔包媽媽黃昏去，豬仔包一去到已經急不及待成為小車手！
「沙田交通安全城」 同「北角百福道交通安全城」嘅遊樂設施相近，一樣係有非常逼真嘅路牌、模擬道路、斑馬線、交通燈、行人過路處、十字路口及行人天橋等。
雖然沙田交通安全公園冇北角百福道交通安全城嘅「 行人隧道 」，但就有「 兒童遊樂場 」，所以屯門、北角同觀塘區嘅都係叫「交通安全城」，唯獨沙田區獨有地叫做「交通安全公園」，可以同時踩單車兼玩滑梯，放電一流！
除此以外，仲有個專為初學者而設嘅「 兒童單車練習場 」，可以練習好先去道路踩踏，夠哂安全！再加上公園內設有單車泊車區，提醒小司機休息時必須將單車泊好係適當位置，唔可以隨意放喺馬路，可以讓小朋友學習交通安全知識之餘，同時成為一個負責任嘅道路使用者，寓學習於娛樂！
其實夜晚去玩都唔錯，人流冇咁多，天氣又涼又舒服，豬仔包都玩得非常盡興
地點：沙田崗背街1號
開放時間：每日8:00 – 23:00
查詢電話：2637 6303
(四) 灣仔海濱花園
灣仔海濱除咗可以玩電動車之外，其實向前行仲有「 水上運動及康樂主題區 」！
主題區以《Chocolate Rain》為主題，沿著海旁走，一路都會發現其蹤影，色彩非常繽紛，就算唔係fans都會想影個相打個卡～
豬仔包一見到「 康樂主題區 」内嘅遊樂設施，已經急不及待要衝埋去玩，雖然設施唔能夠同大型公園比，但吹住海風玩都好寫意！最吸引豬仔包莫過於同聲音有關嘅裝置，一個係「 會發聲嘅滑梯」，而另一個係「 大型傳聲筒」。「 會發聲嘅滑梯 」其實係滑道上面有滾筒，所以玩嘅時候會發出聲音，豬仔包好似發現新大陸一樣，係咁示範畀媽媽睇，仲叫媽媽幫佢拍片！
而「 大型傳聲筒 」同平時公園嘅相類型遊玩設施有啲不同，除咗外型突出同較大之外，傳聲能力仲非常驚人，媽媽講得超細聲，豬仔包都聽得到，仲要係唔知邊個筒連接，要順住管道揾一揾！
到咗差不多回程時，豬仔包玩玩吓「發聲嘅滑梯 」嘅時候，又突然好緊張咁叫媽媽，話另一邊仲有嘢睇，原來係「 水上運動區 」。
由於已經天黑，發光嘅《Chocolate Rain》大型佈置顯得份外搶眼，另外其實公園亦有「 鴨仔船 」可以玩，不過太夜已經閂咗門，大家如果去到都可以試下！玩完之後，媽媽同豬仔包沿住海旁一邊散步，一邊欣賞夜景，真係好Chill～
地點：灣仔北臨時公共運輸交匯處至鴻興道天橋對開
(五) 彩虹主題公園
荃灣全新逾3萬呎PLAY GARDEN空中樂園最近先重新開幕！場內有高達8米嘅「彩虹晴空塔」及接近5米嘅「彩虹秒速滑梯」，另外仲有5大必玩遊樂設施，充滿刺激感之餘，同時訓練到小朋友嘅大小肌肉、手眼協調等等！
一到場內最吸引Kiana嘅係「彩虹晴空塔」及「彩虹秒速滑梯」，Kiana一路玩一路話「好快呀好快呀」，然後又想去玩，不斷重複！
而且公園入邊分咗適合中童、小童同BB玩嘅地方，唔同年紀嘅小朋友都啱玩！
特別介紹仲有跳彈床同埋網型千秋，都係小朋友嘅至愛，而且仲發現入邊嘅攀爬設施都比較特別，喺出邊公園比較少見，會提供唔同嘅方法畀小朋友上去玩滑梯，可以畀小朋友試吓多種新樂嘅方法，非常吸引！
最後當然要講下佢哋嘅設施真係好靚，色彩好繽紛，入到去好似入咗一個影相嘅佈景咁，簡直係媽媽至愛！
地點：荃灣廣場5樓
開放時間：早上10時30分至晚上10時
遊樂區開放時間：早上10時30分至晚上8時
清潔消毒時段：下午2時30分至3時
資料內容及相片獲 豬仔包の開心日常 及 Kiana 的成長日記 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜屯門室內遊樂場「百田樂園」新店玩後報告
週末好去處 ｜6萬呎娛樂體驗區開幕 本地薑過江龍品牌齊集沙田
