博物館節大搞同樂日參觀文物修復實驗室/劇場體驗

博物館好啱一家大小去，現正舉行嘅「香港博物館節2023」，推出約80項精彩節目，多間博物館大搞同樂日，親子齊齊認識鐵路歷史、追逐「港風」和參與藝術活動。

康樂及文化事務署於11月期間舉辦「香港博物館節2023」，以「香港有歷史. 藝術. 科學. 博物館」為主題，轄下博物館及文化空間推出約80項精彩節目，俾大家享受多元藝術與文化。

設多項特備節目

多間博物館於11月舉行同樂日，包括香港文化博物館文物實驗室設有「秘遊文物修復實驗室」特備活動，大家喺文物修復主任嘅帶領下參觀修復實驗室，了解文物修復工作。香港鐵路博物館同樂日有多項特備節目，俾大家認識舊大埔墟火車站及香港鐵路嘅歷史。油街實現同樂日有唔同類型藝術活動，特設夜間流動劇場體驗，大人小朋友可透過多元互動，激發藝術興趣。

週末好去處｜環保概念之旅免費遊 4D電影+玩AR/VR遊戲+導覽

推出全新展覽

此外，多個新展覽亦會喺11月推出，包括香港藝術館嘅「香港賽馬會呈獻系列：提香與文藝復興威尼斯畫派——烏菲茲美術館珍藏展」、香港電影資料館嘅「更衣記——香港電影旗袍戲服秀展覽」及香港文化博物館「迁想無界——韓秉華藝術與設計展」。

科學館周六晚變「科普遊樂園」

為積極響應「香港夜繽紛」活動，香港藝術館、香港科學館及香港太空館至11月底，逢星期五、六、日及公眾假期將延長開放至晚上10時，星期六晚上推出特別活動。例如香港科學館嘅「科普遊樂園」有攤位遊戲，小朋友可製作趣味小手工或親身嘗試不同嘅科學實驗；香港太空館將會化身成「星空遊樂園」，小朋友喺天台使用天文望遠鏡觀賞維港星光。