早前媽媽同豬仔包好開心可以做親子試玩員 ，去到東港城參加由「東港城 x Kiztopia x 新加坡旅遊局 x 新航假期」辦嘅「 彈遊新加坡」活動，睇下有咩咁吸引啦！
「 彈遊新加坡」係Jumptopia 全球首個最大型一體式充氣彈床城堡，呢個以新加坡著名景點為主軸嘅巨型彈跳城堡長達25米，高逾5.5米，總面積5000呎，真係好巨型。
6大專區放電一流
充氣彈床城堡共分６個部分:
-充氣滑梯熱身區
-F1賽車挑戰區
-亞熱帶水果園
-波波池樂園
-障礙陣迷宮
-忍者衝天
由起點充氣滑梯熱身區 ，有兩條熱身滑梯，可以同朋友仔一齊熱身，一齊衝破 障礙陣迷宮，之後搭上新加坡航空再衝落波波池暢泳。
巨型恐龍考體力
攀上巨型恐龍，再到 F1賽車挑戰區 揾化身一級方程式賽車手嘅萌爆魚尾獅Merli打個卡，再衝破 亞熱帶水果園，最後去到 忍者衝天區域，挑戰5.5米高極速滑梯，就算完成。
極速滑梯挑戰膽量
豬仔包玩障礙陣非常落力，玩完一轉都已經爬到身水身汗，極速放電，不過講到刺激又特別，莫過於「5.5米高極速滑梯」連旁邊嘅「忍者衝天」區域。
響呢個區域可以扮忍者衝上️3個不同高度嘅挑戰區，成功就可以穿過5.5米高極速滑梯回到地面。豬仔包試咗好多次都係差一點就滑番落嚟，不過估唔到豬仔包又無氣餒，最後真係比佢成功衝上去，嗰種成功感真係冇辦法用文字形容，開心都不得了。
