香港有好多可以免費參觀又學到嘢嘅展覽館,今次Blogger媽媽同豬仔包擔任親子試玩員 ,參觀位於九龍灣機電工程署新總部大樓嘅「機電‧夢飛翔」展覽館,通過導賞同互動展品,了解機電署嘅機電工程及日常工作。
設免費自助或專人導覽
「機電‧夢飛翔」展覽館及教育徑分為自助導覽及專人導覽兩種,自助導覽無需預約,公眾可以在開放期間自由參觀;專人導覽 則需要填妥表格向機電工程署預約,費用全免。
逾10個互動裝置
![親子好去處-機電署-展覽館-導賞-免費-豬仔包3](https://1283385405.rsc.cdn77.org/wp-content/uploads/2023/09/-3-13-1024x768.jpg)
展館有非常多互動裝置,包括:漫步機電路、影像大放送、認識能源標籤、電力安全你要知、機電與您、機電透視眼、氣體燃料安全小錦囊、開心機電歡樂工程、機智向前路、城市動行 、智能機電城。
豬仔包媽媽同豬仔包到達展館門口,遠遠已經「智析寶寶」打招呼,點名後導賞員首先介紹機電工程署嘅標誌帶佢哋認識,原來標誌除咗隱藏咗工具圖案代表機電工程署嘅工作之外,仲有「E」同「M」嘅機電工程署英文縮寫,亦隱藏去代表機電工程署係用心為市民服務,真係估唔到一個標誌已經包含咁多訊息。
認識機電署特別事
![親子好去處-機電署-展覽館-導賞-免費-豬仔包1](https://1283385405.rsc.cdn77.org/wp-content/uploads/2023/09/-1-22-1024x768.jpg)
之後,就見到有一幅大大小小半球體嘅牆「 漫步機電路 」,原來按下不同年份嘅小圓球,就會在大圓球出現該年份機電工程署發生嘅特別事,睇完已經對機電工程署有深一層嘅了解。
旁邊「 影像大放送」區域有個大螢幕,可以透過影片認識圍繞日常生活嘅機電知識。除咗影片,呢個區域仲有一個用途就係影大合照,大家坐定定,就可以利用牆上附拍攝功能嘅裝置影相,影完仲可以掃QR code儲存影片,非常方便。
再往前行,就去到「認識能源標籤 」同「電力安全你要知」區域,響呢兩個區域,大定會認識到能源標籤嘅等級區分,有咩電器產品係受監管,必須貼上能源效益標籤,亦了解到不同電器嘅安全知識。
機電署服務範圍覆蓋全港
![親子好去處-機電署-展覽館-導賞-免費-豬仔包4](https://1283385405.rsc.cdn77.org/wp-content/uploads/2023/09/-4-6-1024x768.jpg)
之後,豬仔包見到一幅名為「 機電與您」 嘅互動展板,在展板上輕按,機電工程署相關嘅工作範疇就會亮起。呢個裝置令豬仔包媽媽真係覺得好震撼,估唔到機電工程署嘅工作係咁廣泛,所有政府嘅部門、包括市政文娛、醫院、運輸交通、機場、碼頭、甚至連海洋公園玩嘅機動設施,都係佢哋負責提供操作及維修保養服務,仲會提供多元化嘅機電及電子工程設計與節能方案添。
此外,電力公司呢類公營機構,亦受到機電工程署規管,所以機電工程署同市民嘅日常生活有非常重大嘅連繫,是生活不可或缺的部分。
至於館內其他互動裝置「 機電透視眼」、 「 氣體燃料安全小錦囊」、「 開心機電歡樂工程」、「 機智向前路」、「城市動行」及「 智能機電城 」等,會透過體感遊戲、相片分享、滑動裝置等去分享機電工程處對運輸業嘅貢獻、如何利用先進科技去提升維修效率、響幕後又如何默默地為市民服務等,睇完真係對機電工程署有非常深入嘅了解。
戶外教育徑聚集綠色建築科技
![親子好去處-機電署-展覽館-導賞-免費-豬仔包6](https://1283385405.rsc.cdn77.org/wp-content/uploads/2023/09/-6-2-1024x768.jpg)
除咗室內嘅展覽館,導賞員亦會帶我哋去參觀戶外嘅教育徑,展品包括太陽能樹燈飾、建築物光伏系統太陽能板、聚光光伏玻璃鏡、懲教署環保玻璃磚、太陽能水耕種植花園、水輪發電機、檔陽板、雙層玻璃窗、太陽能熱水系統、太陽能風力街燈及太陽能街燈等,可見機電工程署響推廣綠色建築科技非常多元化,風力、水力、太陽能等,通通都可以轉化為能,為機電工程署大樓提供所需電能。
![親子好去處-機電署-展覽館-導賞-免費-豬仔包7](https://1283385405.rsc.cdn77.org/wp-content/uploads/2023/09/-7-1-1024x768.jpg)
週末好去處 |環保概念之旅免費遊 4D電影+玩AR/VR遊戲+導覽
觀景台欣賞光伏方陣
![親子好去處-機電署-展覽館-導賞-免費-豬仔包2](https://1283385405.rsc.cdn77.org/wp-content/uploads/2023/09/-2-15-1024x768.jpg)
最精彩嘅部分,莫過於參觀機電工程署大樓樓嘅天文觀景台。觀景台係一間玻璃室,温度比較高,好似去咗温室咁,響上面可以欣賞到超過 2,000 塊光伏板組成總面積超過 3,000 平方米的光伏方陣,場面真係好壯觀。唔講唔知,原來為咗令光伏板能吸取最多陽光,響角度方面都作出許多測試同調整,先得出22.3度係最適合香港地區,真係非常認真。
喺前往天文觀景台嘅途中,我哋見到沒有燈膽嘅燈,原來係太陽光導管,只要響屋頂或其他可以接收到太陽光嘅位置裝一個光捕捉器,就可以將太陽光聚焦同引導到太陽光導管,將太陽嘅能量同光線引入室內,咁做唔單止可以節省能源,仲可以創造一個明亮同自然嘅環境添,真係非常厲害嘅環保設計。此外,原來冷氣口在腳下比起在天花更快讓身體感覺到涼快,可以減少資源得嚟又得到最大效益。
機電青少年大使現正招募
![親子好去處-機電署-展覽館-導賞-免費-豬仔包10](https://1283385405.rsc.cdn77.org/wp-content/uploads/2023/09/-10-768x1024.jpg)
短短一小時嘅導賞團好快就完結,臨走可以夾公仔贏奬品,豬仔包竟然成功咗,真係非常開心。夾公仔時,媽媽發現一個名為 「E&M Young Ambassador 機電青少年大使」嘅活動計劃,只要登記成為會員,就可以參與呢個計劃嘅活動,當中最吸引嘅就係STEM嘅工作坊,知道參加年齡已降至3歲,媽媽都即時幫豬仔包登記咗,好期待之後報名參加工作坊。
如果大家有興趣參觀機電工程署大樓7樓嘅天文觀景台同聽埋整個大樓嘅環保概念,就記得要預約導賞團啦。個人預約每月有兩場,時間可參考網頁。而團體申請最少6人就可以提出申請,導賞時間仲會增加至1.5小時添。