Blogger豬仔包媽媽同豬仔包早前參加咗一個社區探索活動「香港世界牛奶日 x OHMYKIDS『童遊油麻地』」。豬仔包媽媽覺得呢個活動非常特別，係由小朋友做領隊，帶住爸爸媽媽去探索油麻地。
獲得一份小領隊選手包
活動開始前，每位參加小朋友獲得「小領隊選手包」一份，內有「童遊小領隊」T-shirt、領隊「Follow Me」旗仔、毛巾、地圖等，最特別係有張「家長靜音模式貼紙」，家長唔可以提示，一於畀小朋友擔大旗做小領隊，帶領家長玩轉油麻地。個「小領隊選手包」仲附送子母產品，畀小朋友沿途補充體力，完成任務呢！
簡介會初步了解活動
喺活動開始前，參加者必須出席線上簡介會，畀小朋友初步了解油麻地嘅歷史同埋現況，仲詳細講解活動嘅玩法，最後會獲得通關密碼用嚟做解鎖任務，自行選定時間，各自到社區進行實體活動。活動期間用手機應用程式實時提交探索任務嘅答案，會即時取得分數同排名呀！
核對裝備黃昏出發
由於嗰段日子唔係落雨就係太陽好猛烈，所以豬仔包媽媽揀咗一個天朗氣清嘅黃昏同豬仔包出發。出發前，佢哋根據地圖上嘅檢查清單，逐一核對有冇帶齊裝備，跟住就搭港鐵出發前往油麻地。喺港鐵站裏面，媽媽同豬仔包一齊睇地圖，擬定路線，完成後就立即開始任務，由豬仔包帶住媽媽去探索。
舉着「Follow Me」旗做領隊
由於平日媽媽帶豬仔包去街，搭港鐵都會畀豬仔包幫手搵出口，所以呢個搵出口任務對豬仔包嚟講毫無難度，仲攞住支「Follow Me」旗仔好有自信咁帶住媽媽行呢！
要求出示「救命卡」
不過出到地面，豬仔包就非常迷惘，完全唔知點樣睇地圖嘅方向，所以極速就要出示「救命卡」，向媽媽求救，媽媽當然義不容辭，耐心咁教導豬仔包點樣分辨方向，例如可以透過街道牌、大馬路等去辨認方向，講解完一大輪，豬仔包明白後就再次出發。
順利找到第一個Check Point
豬仔包好快好順利咁就搵到第一個Check Point，跟住佢哋就攞出任務卡去睇問題，然後由豬仔包搵答案，媽媽就將豬仔包嘅答案即時用手機程式作答，答啱答錯都會即時知道。完成第一個任務，豬仔包非常興奮，即刻就向第二個Check Point進發。豬仔包有咗第一次經驗，佢已分辨到前、後、左、右，喺冇行錯路嘅情況下，好快亦都完成第二個任務。
飲奶補充體力
由於一開始用咗好多精力去學睇地圖，所以完成第二個任務後，豬仔包已經有點攰，呢個時候喺「小領隊選手包」嘅子母飲品就大派用場，佢一邊補充體力，一邊繼續帶住媽媽去其他Check Point，務求爭取一分一秒想盡快完成任務。
完成辛苦行程
媽媽覺得豬仔包真係非常厲害，因為整個過程只係問過路人一次，其他都係佢獨自完成嘅，連最辛苦行上去京士柏遊樂場，同埋油麻地配水庫，佢都全程自己行，媽媽同豬仔包由配水庫離開行番去油麻地消防局時，仲一邊行長樓梯，一邊數級數，發現有386級咁多噃！
