Web Interstitial Ad Example

週末好去處 |推介5大CP值極高親子餐廳 2百蚊165分鐘任玩食貓cafe超吸引

15-01-2023
20221101 Kiana 親子餐廳 週末親子遊

一到假日,梗係要帶小朋友出去放下電啦,而且仲可以增加多啲親子同樂嘅美好回憶!今次為大家搜羅深受媽媽blogger喜愛且CP值極高嘅親子餐廳,唔單只有得玩仲有得食,玩完仲可以一家大細食餐好嘅!想知係邊幾間親子餐廳?即刻跟媽媽Blogger去搵食!

推介1: 有得食、有得玩親子自助餐

今次曾芯.曾薏又跟媽媽同一齊去玩啦,仲玩到唔願走,入到去成間餐廳色調都好夢幻,入邊仲分咗4個玩樂區!

第一個區 :化妝室


第二個區 :超市及煮飯仔


第三個區 :波波池及跳跳床


第四個區 : 粒粒沙池


餐廳有分自助餐及半自助餐,要提早預約,去之前可以留意餐廳網站或電話查詢。曾芯.曾薏跟媽媽星期五去食自助晚餐,食物種類唔算好多,主要有意粉、飯、pizza、薯條及甜品。

提提大家記得要去試北海道布甸,曾芯.曾薏媽媽就一次過食咗兩個,另外更有餐廳更有雪糕提供,不過要自己問職員拎。

價值方面約兩百蚊左右包任食+玩足2小時45分鐘,而且3歲以下小童免費,十分抵!

不過餐廳只開星期四至星期日,大家記得要預約,因為星期六日好full

餐廳: Whizbo Kids Cafe
地址: 馬鞍山保泰街16號We Go Mall 4樓5號鋪
電話: 2623 0396

推介2: $65兒童餐,包可愛啫喱雪條

Kiana媽媽推薦呢間餐廳坐得舒服,地點方便,最重要係兒童餐有一條好特別嘅啫喱雪條,小朋友一見到就勁鍾意!兒童餐包括肉醬意粉、八爪魚腸仔、雞翼、薯條及啫喱雪條,有興趣可以去試,因為除咗兒童餐,大人嘅嘢食都唔錯!

餐廳:紅碼蟻
地址:九龍深水埗深旺道28號V Walk 2樓29號舖

推介3: 隱世高質平價恐龍餐廳

第二間深受Kiana媽媽喜愛嘅係大人小朋友都被受吸引嘅平價恐龍餐廳,一坐低Kiana已經獲得恐龍筆一技、恐龍餐盤、同每枱都有嘅小恐龍玩具,走嘅時候仲有恐龍貼紙!

食物方面亦好高質,Kiana媽媽覺得所有野食都好味過一般餐廳,仲要價錢好平!All day breakfast 嘅煙三文魚好香好厚、竹炭麵包夠特別同好味。漢堡包有好多層,肉亦好實好香牛味,唔會覺得加咗好多粉、而Kiana就好鐘意食個意粉沙律!

飲品方面,就算叫一杯熱朱古力都有拉花,聽人講咖啡都好飲又好平,而家做緊折,價錢吸引,講多次,食物係高質架!

提提大家,餐廳送畀小朋友嘅小禮物同熱朱古力拉花可能會因應餐廳情況有調整,太忙就有機會未必做到,但多數應該有

週末好去處 |環保概念之旅免費遊 4D電影+玩AR/VR遊戲+導覽

餐廳:Yummy Dino
地址:屯門湖翠路2號美樂花園商場地下64號舖

推介4: 貓貓cafe

另外一間Kiana媽媽推薦嘅就係貓猫Cafe,呢間Cafe好乖同好靚,Kiana第一次去好興奮,係咁摸貓貓,而猫猫都好似好享受嘅樣,食晒枱上食物之後,仲可以加$20買貓貓罐頭或其他食物餵猫猫,一有嘢食,就會有好多貓圍住你,大家仲可以自行帶貓貓玩具同猫猫玩, 重點係呢間Cafe食物都好好味

呢間猫猫Cafe兩間分店,兩間都各有特色!

餐廳:Urban Cafe
地址:旺角彌敦道566-568A號僑建大廈2樓 / 觀塘開源道62號駱駝漆第一座6樓

推介5: 豐富兒童餐

另外Kiana媽媽分享嘅呢間餐廳好適合大人食,兒童餐只需$68,價錢合適食物好味,仲有超吸引嘅甜品,地點方便,全港都有。見到個多士盒就知係邊間啦,就係茶木啦!

餐具外形有車同飛機可以揀,食物都好吸引,兒童餐有芝士無骨雞翼、蕃薯條、魚蛋(有餡)、蔬果(橙、西瓜、火龍果、栗米)同肉醬麵加橙汁,Kiana成程都好乖咁食嘢 (應該係每個媽媽嘅夢想)

大人晚市方面,價錢大概70-120不等,平日仲可以加$30變成套餐會包飯、甜品同飲品(有珍珠奶茶),食物好食好正好抵!

餐廳:茶木

資料內容及相片獲 Kiana 的成長日記 曾芯.曾薏 專頁授權轉載

更多相關文章
週末好去處 |新界九龍區四大兒童室內遊樂場玩後報告
週末好去處 |荃灣全新3萬呎兒童遊樂場 巨型滑梯/鞦韆/繩網/平衡橋
週末好去處 |全新沙田Play Park試玩體驗 玩轉Kiztopia多款刺激遊樂設施

週末好去處-沙田-playpark-kiztopia