繼續為大家介紹兒童室內遊樂場！今次介紹係全新嘅深水埗體育館兒童遊戲室，第一日開，媽媽就帶住豬仔包嚟探路，排隊人數唔少，目測要等至少1至2節時間先可以入去，但都聽聞下午嚟要等3節。到底值唔值得等？ 一於等 豬仔包媽媽 同大家走一轉，分享下親身體驗！
碼頭主題遊樂場
呢個兒童遊戲室以碼頭做主題，地方非常闊落，每節42人，完全唔會迫。
裡面有兩艘船，一艘係漁船，另一艘係小船。兩艘船都有船舵，可以揸船做小船長，轉動船舵仲有船長講嘢添，但媽媽真係聽唔到佢講咩
滑梯設不同刺激程度
全場滑梯有成4條咁多，BB版、正常版、旋轉版同刺激版，總有一條岩玩，小朋友點會唔鍾意丫
雖然有4條滑梯，但豬仔包完全係主攻刺激版嘅滑梯，係一個大彎型嘅滑梯，相當特別又刺激，連大人都玩埋一份
除咗滑梯，最吸引豬仔包就係轉動會播兒歌嘅裝置，碼頭同小船上面都有，完全唔駛爭，仲比豬仔包發個喇叭喺船底，轉到冇停手
顧及不同年紀孩童
年紀幼小嘅BB，呢個遊戲室都照顧到，部份牆上玩樂裝置係設置喺「碼頭」兩旁，有小梯級可以爬，又可以靜靜自己擁有一個小天地，唔駛驚大哥哥大姐姐撞到
媽媽仲留意到，平時嘅動物軟墊都比較厚，但呢個有隻薄薄嘅籃色鱷魚，媽媽覺得非常適合小小B玩
週末好去處 ｜沙田佔地1萬2呎室內遊樂場Kiztopia 設15大遊樂體驗區＋4米巨型滑梯
呢個兒童遊戲室，媽媽覺得非常非常高質，設施新穎又闊落，仲照顧不同年紀小朋友需要，最重要係免費，難怪等咁耐都繼續大排長龍。
唯一係要留意，旋轉版滑梯速度快，出口部分好多時都有小朋友路過或搬積木，媽媽當日見到好多小朋友響呢個位置撞親，玩嘅時候真係要份外小心!
45分鐘飛咁快就過去咗，豬仔包完全唔捨得走，希望遲啲冇咁多人，可以再玩過!
深水埗體育館兒童遊戲室
開放時間：9am-7:45pm
地址 : 九龍深水埗深旺道38號深水埗康樂文化大樓2樓
每節人數：42人
保養日: 每月第二及第四個星期一、時間: 早上9時至下午3時
查詢電話 : 2360 2276
資料內容及相片獲 豬仔包の開心日常 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜香港故宮文化博物館懶人包
週末好去處 ｜新界九龍區四大兒童室內遊樂場玩後報告
