豬仔包媽媽 繼續為大家介紹親子好去處，今次介紹嘅地方甚具教育意義，係可以學習環保概念嘅「可持續資源館S Gallery」，費用全免，館內有多個展區，除咗有多個互動裝置，AR變裝遊戲，最重要係玩樂之餘仲可以學習到環保知識，一於跟豬仔包媽媽行一轉！
媽媽自從認識裸買之後，對環保嘅嘢留意多咗，帶豬仔包去綠在區區學習廢物分類回收、去粒粒皆辛館學習將廚餘再生，珍惜食物、去O·Park了解如何轉廢為能等等。
今次媽媽帶豬仔包去了可持續資源館 S Gallery學習一下如何減少資源浪費，保護環境。 可持續資源館 S Gallery以太空母艦作為背景，小朋友可化身小太空人，跟隨領航員 水熊爺爺 完成訓練任務，學習可持續的概念及解決地球污染問題。
展館分為四個部份，分別係穿梭時空 、 探索資源 、 耕出未來 及 可持續生活 。
穿梭時空區域
首先我哋去到 穿梭時空 區域，豬仔包同媽媽一齊化身太空人，登上太空母艦，戴上眼鏡，由職員介紹咗 水熊爺爺 畀我哋認識，跟著我哋就預備升空啦！呢個時候風同煙都噴出嚟，加上張櫈仲要震，豬仔包緊張到捉實媽媽同水熊爺爺公仔，真係好似火箭要升空咁！
週末好去處 ｜新界九龍區四大兒童室內遊樂場玩後報告
探索資源區域
睇完4D電影，認識咗綠色生活同埋學習可持續發展嘅重要性之後，職員派咗每人一部手提電話，我哋就進入 探索資源 區域啦。小朋友可以攞住手機，掃描牆上面圖案，就會見到好多瀕危物種嘅海洋同陸地生物，豬仔包同小朋友們都玩得好投入，務求集合哂所有生物
另一邊亦有一些標本，導賞員介紹人類用咗好多動物牙齒和動物皮膚去製作飾物同手袋等製品，這些都只為了美觀，但並不是必須的，豬仔包見到老虎皮標本，仲記得之前媽媽帶佢去過 瀕危物種資源中心 都見過，話要再去多次探老虎，玩完小遊戲後，我哋就進入下一個區域耕出未來 ，呢個區域以農場做背景，豬仔包已急不及待第一個跑咗入去
週末好去處 ｜沙田佔地1萬2呎室內遊樂場Kiztopia 設15大遊樂體驗區＋4米巨型滑梯
耕出未來區域
入到去，小朋友可以再次攞起手機掃描牆上昆蟲圖案，會見到昆蟲會立體呈現出來，如果不成功，就代表該昆蟲係保護唔到泥土架啦！另外，展區亦有好多互動裝置，豬仔包可以透過小遊戲，認識有機耕種。原來不同季節要種植不同種類農作物，先可以平衡到泥土嘅養分，成為健康嘅泥土
呢個區域其實對豬仔包嚟講都幾深奧，連媽媽都要消化吓內容，不過互動遊戲畀小朋友按下見到答案錯，慢慢就會知點先係正確。
可持續生活展區
最後嚟到 可持續生活 展區，大大個真實超級市場非常吸引豬仔包，道具非常像真，小朋友又可以攞起手機將有機嘅食品同用品選購，揀得岩可以食得健康之餘，仲可以減少環境污染。
另外，亦有一個AR變裝遊戲，教小朋友分辨哪些是有機物料。最震撼嘅就係導賞員話比我哋知，如果我哋再繼續浪費資源同污染環境，地球響不久嘅將來會冇哂糧食，人類就要靠食藥或者打針嚟維持生命
完成整個旅程，所有人就返回太空母艦，每個小朋友都可以選一份小禮物先離開，非常開心。媽媽覺得小學生會比較適合參觀，因為可以好好咁接收資訊，不過場內有很多AR同VR嘅互動遊戲，年紀細嘅小朋友都可以樂在其中！今次最大得著係，每次媽媽見到豬仔包浪費，就會提醒佢，係咪想第時乜都冇得食，只能食藥打針，佢就會即刻變乖，不再浪費！
可持續資源館 Sustainability Gallery
地址：香港浸會大學陳瑞槐夫人胡尹桂女士持續教育大樓 (SCE) 12 樓
開放時間：星期二至星期日 10:00 – 17:30 （逢星期一休息）
查詢電話： 3411 7164
交通：可於九龍塘港鐵站 D 出口乘 25M 專線小巴，在「浸會大學宿舍」下車後進入校園並轉右往孫中山銅像方向行走)
費用：全免
預約參觀：https://s-gallery.hkbu.edu.hk/zh/booking/
資料內容及相片獲 豬仔包の開心日常 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜香港故宮文化博物館懶人包
週末好去處 ｜屯門室內遊樂場「百田樂園」新店玩後報告
