繼續為大家介紹兒童室內遊樂場！今次會介紹嘅係位於屯門區嘅「百田遊園」，場地超大，住喺新界西北部嘅爸爸媽媽一於帶埋小朋友放假去玩過夠盤！想知場地上有咩設施玩，抵唔抵玩 ? 一於等 豬仔包媽媽 同大家走一轉，分享下親身體驗！
百田遊園其實係媽媽非常喜愛嘅室內遊樂場，而屯門店更係媽媽首選推介，遠征也在所不惜，因為真係好玩兼抵玩，仲要員工服務態度非常好，上一次去係百田遊園地面層嘅舊店，今次去嘅係商場3樓嘅新店，所以對豬仔包嚟講，同未玩過冇乜分別，今次仲有同學仔同行，更加開心！
場館大概分開三部分，一係電動車區 ；二係玩具室 ；三係放電區
電動車區
媽媽都唔知點形容呢架新式嘅電動車，佢個樣一啲都唔似車，好似碰碰車，又似大型自動吸塵機。豬仔包坐上去攞住兩支控制杆轉嚟轉去，都唔知想行去邊，臨走玩多次先發現有個西瓜波，原來係足球機嚟！職員見得豬仔包一個玩，仲主動搖控另一架車陪玩，非常窩心～
玩具室
呢個玩具區有梳化、枱同櫈畀小朋友坐得舒服慢慢玩，玩具仲要係海量，真係任何類型都有，好誇張！尤其啱細B靜靜地慢慢玩，加上清潔姨姨長期助陣幫玩具清潔，真係玩得好放心，同場更有職員陪豬仔包玩玩具傾偈，媽媽覺得係星級嘅服務！
週末好去處 ｜沙田佔地1萬2呎室內遊樂場Kiztopia 設15大遊樂體驗區＋4米巨型滑梯
放電區
呢個區域係豬仔包嘅重點遊玩地，電動天鵝船、充氣城堡、滑梯、木粒沙池及繩網，全程不斷走上走落，跑跑跳跳，極速放電！滑梯同繩網都有職員幫手，媽媽唔使跟著都放心，場內所有設施全部都係任玩，冇額外收費，媽媽覺得淨係天鵝船、充氣城堡同電動車已值回票價，如果住屯門，豬仔包應該日日都想去！
百田遊園
百田遊園業務室內兒童遊樂場現時設有3間分店，分別位於屯門、銅鑼灣及黃大仙。室內兒童遊樂場主要分為電動車、電動船、手攪船、繩網、兒童彈床、木粒池、兒童主題玩具室，迎合不同年齡的小朋友，令他們有不同的體驗。
開放時間：11am-9pm
屯門店收費：星期一至日收費相同（時限：1小時45分鐘，全場任玩）
會員價 $210
非會員價$240
優惠時段收費（7pm-9pm）
會員價 $140
非會員價$170
注意事項：
（１）一位小朋友可一成人陪同 不設成人票價
（２）周末及假期只可以一位大人入場，輪流陪小朋友玩。如果當時場地人數唔多，我地會酌情俾多位大人入場。
（３）沒有歲數限制，小朋友只要玩就收費，不玩就不收費
（４）建議提前預約確保有位，如無預約到場，時段額滿則無法進場
（５）不同分店收費不一
屯門店地址： H.A.N.D.S。愛定商場A區3樓302室
銅鑼灣店地址：銅鑼灣皇室堡 13樓01-05室
佐敦店地址：尖沙咀彌敦道219號莊士倫敦廣場2樓 (期間限定店，去到10月咋！）
黃大仙店地址: 黃大仙睦鄰街8號現崇山商場地下G13A號
資料內容及相片獲 豬仔包の開心日常 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜香港故宮文化博物館懶人包
週末好去處 ｜新界九龍區四大兒童室內遊樂場玩後報告
