準備帶小朋友去英國升學嘅家長，揀居住地區時，其中最大考慮就係該區有冇完善嘅 校網，因為住得近，入到心儀學校嘅機會就愈高。相信唔少家長都知道，倫敦作為英國嘅中心地帶，市內唔少區嘅 校網 都非常優秀，而家一齊嚟了解倫敦嘅 校網！
校網一 : 泰晤士河畔京斯頓（Kingston-Upon-Thames）
據英國教育部公佈，Kingston 校網 內嘅學校普遍獲得表現較佳嘅英國初中畢業（GCSE）考試成績，超過三分二11年級學生獲得嘅兩門課程成績均為9到5級之間 (即約B至A*級別)。區內有34間公立小學，當中有24間被教育局評為一等優異，其中9間學校更成為全英同一等別嘅學校 Top 10%。
該區The Tiffin女校及男校係英國Grammar School中相對著名嘅學校，每年呢兩間學校都有四分一學生考到入牛津及劍大學。另外，作為該區新校嘅金斯頓學院更喺開學頭兩年獲得優異評級。其次Coombe Girls School女校及Richard Challoner全男公立天主教學校更被列入當地表現最佳嘅公校
校網二 : 巴奈特（Barnet）
巴奈特 校網 位於倫敦北部，有117間學校，當中有88間小學及24間中學，其中大部分都被評為優異或良好，平均獲得好評嘅分數超過倫敦及全英國嘅一般水平，亦曾於GCSE公立中學成績排行榜中，被評為最優房嘅公立學校區域。全個市鎮，排前5名嘅公立中學當中有3間都係嚟自呢巴奈特，而唔少畢業生都成功入讀到牛津、劍橋等知名大學。
其中該區嘅公立女子學校Henrietta Barnett School及公立男子學校Queen Elizabeth’s Grammar School for Boys 都喺GCSE及A-LEVEL 成績獲得唔錯嘅成績。
校網三 : 布羅姆利（Bromley）
曾有一份英國研究報告指，住喺布羅姆利嘅市民係最和善。校網 方面，當區都擁有倫敦區最好嘅小學 校網，而區內中學都唔輸蝕，GCSE及A-LEVEL 公開試成績都有較好嘅表現，亦成為倫敦區裡成績排名前五位嘅常客。
其中區內最出名嘅學校為St. Olave’s and St. Saviour’s Grammar School男校，該校學生成績非常好，有9成學生喺2019 A-level中取得B至A*嘅成績，而89.4%嘅學生喺GCSE考試中都拎到7-9分，整體成績於全國公立中學中排第6
校網四 : 哈羅（Harrow）
據英國 校網 資料網數據指，哈羅區內嘅小學及中學排名都非常高。其中國際頂尖學院Harrow School 更培育出唔少政治及經濟精英。其次，該區嘅Whitefriars School更係倫敦一間公立名校，特色為一條龍公校，子女由三歲開始讀幼稚園到考A-Level都唔使轉校。而且區內都有多間受英國教育標準局評為優秀嘅學校，如Marlborough Primary School、Pinner Park Junior School、Nower Hill High School等。
