【聖誕好去處】西九文化區變身冬日浪漫歐陸聖誕小鎮必影20米高聖誕樹＋睇M+博物館

聖誕好去處 — 無得飛去外地就無得過歐陸聖誕？錯錯錯！今年喺香港一樣可以過一個氣氛濃厚嘅浪漫歐陸聖誕！西九文化區藝術公園今年就變身成夢幻聖誕小鎮，高20米嘅巨型聖誕樹加埋特別閃燈效果，絕對係聖誕打卡好去處！同場仲可以去睇M+博物館，啱晒同小朋友去培養藝術氣息！

聖誕好去處 — 西九浪漫歐陸聖誕小鎮必影巨型20米高聖誕樹

今年西九文化區以法國童話夢幻小鎮爾馬 (Colmar) 為設計藍本，將藝術公園打造成浪漫歐陸聖誕小鎮，令大家尤如置身於歐洲，感受濃厚聖誕氣氛。現場唔單止有8間聖誕小屋任人打卡，更有高20米嘅巨型聖誕樹，足足有成6層樓高！配合埋現場音樂更有特別閃燈效果，加埋背後嘅維港美景，超唯美嘅畫面絕對係今個冬日必去嘅打卡熱點，爸爸媽媽一定要帶小朋友去影靚相！

除咗欣賞夜景之外，大家亦可以沿着西九海濱長廊踩「悠遊西九」單車，邊吹住清爽海風、邊欣賞美景，無論係男女老幼都會樂在其中。

「香港繽紛冬日巡禮」聖誕小鎮
開放日期及時間：
即日至12月21日
星期一至五：5:00pm – 11:00pm
星期六、日：11:00am – 11:00pm
12月22日至1月2日
星期一至日： 11:00am – 11:00pm
12月24日至25日
時間：11:00am – 1:00am
12月31日
時間：11:00am – 6:00pm
*最後入場時間為場地關閉前30分鐘
地點：西九文化區藝術公園海濱草坪 – 西面

同場加映：免費參觀 M+博物館 17,000米空間展出歷年多件作品

西九藝術公園當然唔止得一個打卡熱點，附近嘅自由空間壁畫、比賽展亭「Growing Up」及 M+幕牆亦絕對唔可以錯過！而M+博物館亦都正式開放，17,000米空間包括33個展廳、3個戲院、多媒體中心、學舍，開幕展更有6個專題展覽展出博物館多年來收集嘅作品，大家可以帶小朋友去培養一下藝術氣息。而天台花園可飽覽維港景色，亦係熱門打卡點之一。M+博物館由開幕起計12個月都可以免費入場參觀，不過提提大家記得要提前預約，以免去到現場「摸門釘」。