由情歌王子到暴龍哥，再到「暖男爸爸」的鄭中基，人生可謂經歷過幾許風雨，曾於事業上軌道時因在飛機醉酒鬧事，被一度由高處打落低谷，但同時亦因為此事令鄭中基有所成長，由歌手轉型成為喜劇演員，由浪子變成現實中嘅「暖男爸爸」。鄭中基入行第27年，現時除咗係一位藝人，更係一位YouTuber，形象隨着不同嘅人生階段而不斷轉變，背後最大動力全為太太及一對寶貝仔女。

初出道鋒芒一時無兩
與多位樂壇天王天后合唱

鄭中基就讀聖類斯中學，父親為金牌大風唱片公司總裁鄭東漢，由於父親從事音樂事業，加上鄭中基天生有一把非常悅耳嘅聲線，目標很明確要出道成為歌手，雖則先天條件看似已贏在起跑線上，但鄭東漢曾寄語鄭中基：「呢個世界得一個張學友，唔會有第二個，亦都唔會有第二個許冠傑、鄧麗君。你要自己諗，可能之後唔會咁成功，或者可能會成功啲，但係千祈唔好話做第二個張學友，冇可能。依家就話咗畀你聽，咁你自己諗下做唔做。我唔會主動話你知要做乜，但你有問題可以隨時嚟問我。」而確實往後鄭中基遇到嘅經歷，亦足而證明並無因爸爸係唱片公司總裁而令自己嘅命途變得更得天獨厚。

圖片來源 : IG@tinyeyes39

鄭中基出道時推出國語專輯，但當時發現外界對自己嘅音樂並無太大反應，曾感到與歌手身份無緣，想過退居幕後，不過後來走訪不同校園時，與學生jam歌，過程十分開心，令鄭中基重拾唱歌嘅熱情，於是便繼續向音樂事業發展。後來打入廣東樂壇，出道初為力捧新人，因聲線與張學友相似，更曾被封「張學友接班人」，而後期更與張學友與鄭中基合唱《左右為難》、與陳慧琳合唱《製造浪漫》及與許志安、張學友三人合唱《甲乙丙丁》，令鄭中基聲名大噪。

明星成長 ｜ 加拿大為港姐留學熱門地

音樂事業上軌道時發生醉酒鬧事
受劉偉強邀請轉型成為演員

正當鄭中基事業逐漸上軌道時，卻因飛機醉酒鬧事而被一下子推到低谷。2016年鄭中基由美國飛往台北，期間因醉酒失控，一度對空姐及副機長做出冒犯行為，導致機長要以電筒扑頭制服鄭中基，飛機亦要緊急降落，最後鄭中基被美國FBI拘捕，被控告襲擊及騷擾兩項罪名，最終判罰款2,500美元及留案底。此事一出，即讓鄭中基本來建立好嘅一切推倒，事業下滑，被當時唱片公司放棄，經歷人生低潮。

鄭中基指當時低潮期第一個邀請自己轉型成為演員嘅係劉偉強導演，不過鄭中基更曾稱開拍《愛君如夢》第一日拜神便遲到，因醉駕撞車要上庭，當時劉德華對鄭中基講咗句：「浪子回頭金不換，你要想自己以後的日子要怎樣走。」鄭中基自此便決心將最擅長嘅唱歌事業放低，專心向演員事業發展。轉型成為演員後，鄭中基嘅喜劇細胞一度被發挖，並以喜劇演員出演多部電影角色，受到大眾歡迎，包括《行運超人》嘅電蟹、《龍咁威》嘅龍威及《低俗喜劇》嘅暴龍哥，最終更憑暴龍哥一角成功奪得香港電影金像獎「最佳男配角」，為演藝事業奠下基礎。

明星成長 ｜ 余香凝自小想做空姐 後為演戲讀心理學

為家庭一改騎尼形象 再轉型做暖男爸爸

現年50歲嘅鄭中基，已為兩個小朋友嘅爸爸，擁有一個非常幸福嘅家庭，並一改以往搞鬼扮女人騎尼嘅形象，出演VIUTV電視劇《暖男爸爸》，更加入YouTube 界開設YouTube Channel「機動電視台RTV」分享生活趣事。鄭中基曾於訪問中表示，現時較以往更有興趣接多啲卡通片配音工作，另更有宣傳健康飲食，戒掉酗酒行為，全因希望子女睇到自己健康嘅一面。雖然鄭中基表示自己依然喜歡唱歌，但演藝事業嘅發展亦為自己帶來唱歌機會，近年鄭中基就有舉行紀念演唱會及為電視劇集唱主題曲及插曲，可見人生重回正軌，事業家庭兩得意。

回望過去，鄭中基重提飛機鬧事一事時，形容為人生最深刻嘅一次經歷，並稱此事令自己成長好多：「以前唔會好深入諗問題，覺得唔好理喇，今日開心咗就算。喺嗰個年紀唔會諗到咁遠，就弊喇，嗰次教訓好大，突然間失去咗好多嘢。」「諗返轉頭，嗰時個天待我不薄，冇要我死，只係好大力扑我一吓：『喂你好醒喇！再唔醒就唔得』」

相關文章:

明星成長 ｜ 薛凱琪患抑鬱企圖自殺幸獲圈中好友解救 養貓令自己變得堅強
明星成長 ｜ 周星馳由兒童節目主持做起 奮鬥多年成為香港喜劇之王
明星成長 ｜ 吳君如喜劇角色彈起 高峰時一年拍13部戲

The post 明星成長 ｜ 鄭中基「暴龍哥」走到「暖男爸爸」進化史 appeared first on 新城教育+.