近來天氣好好，適合戶外活動，親親大自然。今次豬仔包媽媽同豬仔包，在假日約咗同學一齊去橋咀洲行山玩沙，開心度過一天，一齊睇下橋咀島美景和有咩玩啦。

豬仔包一行人先到西貢碼頭，由西貢碼頭坐船到橋咀洲非常方便，大約10-15分鐘就到。落船後去過洗手間，就出發去郊野公園步道行山。

橋咀島有何特別？

橋咀島地理獨特，位處火山口邊緣，島上大部分岩石都是多年前火山爆發時，所流出的熔岩冷卻而形成。

豬仔包一行人一起步，就見到有個「菠蘿包攞住菠蘿石」嘅陶瓷，十分可愛，再往前走，又多個「火山攞住菠蘿包」嘅陶瓷，全部都同橋咀洲歷史有關，真係可以一邊行山，一邊介紹歷史俾小朋友聽。

山路唔算難行，不過就好多碎石，同埋步道比較窄，所以小朋友行都要份外小心。

佢哋慢慢行，行咗40分鐘就輕鬆到達「黑山頂」，風景真好靚，又見到可愛陶瓷同埋應該係全港唯一響郊野公園嘅自拍神器，不過太多人圍住自拍神器，佢哋就冇影到。

本來繼續向前走，就會去廈門灣，不過由於冇船走，佢哋就響旁邊坐低休息食嘢，跟著就沿路回頭番去橋咀沙灘好了。

行連島沙洲如「水上飄」

豬仔包一行人行山前，潮水開始慢慢退。落山後，大半條「橋咀洲地質步道」，亦即係「連島沙洲 」出現了。潮漲時橋咀島和橋頭是兩個獨立的小島，潮退時中間會露出一條石堤接駁兩邊，這就是「連島沙洲」。最佳行走時段爲海水微漲時，淺水略淹沙礫路，遠望似在海中心步行，我哋行山回程都見到小朋友極快跑過，好似水上飄。

其實香港唔止一個「連島沙洲」，不過橋咀島呢個係最方便到達，所以遊人非常多。

行「 橋咀洲地質步道」真係要小心，除咗有菠蘿石之外，仲有好多大大小小的石頭，加上潮水剛退有點濕，好容易滑倒。

由於潮水只退了約95%左右，行到最後，有一部分還在水裡，由於豬仔包好想過去，豬仔包媽媽就抱住豬仔包，響浪退走時衝過去，可惜還是不夠快，當浪湧回時，豬仔包媽媽鞋還是濕了。

過到對面，豬仔包非常興奮，排隊影相打後，本來想行上山睇吓，但醒起船最遲5:30就離開，於是豬仔包媽媽還是急急腳帶豬仔過返沙灘，今日回頭走成功冇濕腳啦。

回到沙灘，一班小朋友好開心咁玩吓沙，夠鐘就收拾，搭船回程了。 今次旅程非常完滿，可以行到山，去到山頂，又見到連島沙洲，仲成功過到對面島，天氣又唔凍，有太陽非常舒服，豬仔包走時已經話下次要再去。

週末好去處 ｜環保概念之旅免費遊 4D電影+玩AR/VR遊戲+導覽

資料內容及相片獲 豬仔包の開心日常 專頁授權轉載

更多相關文章
週末好去處 ｜屯門室內遊樂場「百田樂園」新店玩後報告
週末好去處 ｜ 精選5大免費STEM兒童探知好去處
週末好去處 ｜參觀特色博物館 自訂港島免費遊路綫

The post 週末好去處 ｜橋咀島一日遊巧遇連島沙洲   行山+玩沙+睇地質奇觀+搵奇石 appeared first on 新城教育+.

今次介紹畀大家嘅活動，唔只可以郊遊，學習自然保育及認識各種香港生物，仲可以玩埋工作坊，訓練手眼協調，展現藝術細胞DIY新春裝飾。住喺港島嘅朋友前往就更加方便，因為今次豬仔包媽媽同豬仔包去嘅地方係位於鰂魚涌嘅林邊生物多樣性自然教育中心（紅屋），即刻睇下裡面有咩玩！

林邊生物多樣性自然教育中心（紅屋）簡介

林邊生物多樣性自然教育中心（紅屋）於1922年興建，原作太古糖廠的高級職員宿舍。1998年被列為二級歷史建築物，2012年活化成為香港第一所生物多樣性自然教育中心。中心設有三個主題展覽廊、多功能會議室、資源室、活動室和自然園區，以介紹香港珍貴嘅自然資源及生物多樣性，提高大眾對香港生物多樣性嘅認識、了解其價值及重要性、鼓勵大眾積極參與及支持推動自然保育的活動。

出發前必備

由於紅屋位於柏架山道自然徑，大家記得去嘅時候帶備下列用品：

— 太陽眼鏡和帽
— 食水和乾糧
— 蚊怕水
— 望遠鏡
— 風扇仔

豬仔包一家喺柏架山道入口，一路沿住車路行上去，唔使20分鐘已經到達目的地，沿途有兩個休憩處可供休息，車路推BB車都好方便。

紅屋三大展覽廊 認識多樣性生物

一入到去會首先見到展覽廊一正播放影片，介紹生物多樣性嘅定義、作用及價值，不過想睇多啲生物，就要去展覽廊二參觀。到達展覽廊二，第一眼唔係見到生物，而係一個可以轉動嘅花花板，轉呀轉，轉咗一大輪，就可以入少少睇多樣性生物。

除咗海星同烏龜，重有比較少見嘅長尾南蜥及花狹口蛙等，另一邊則有標本動物，玻璃上會有相關介紹，可以逐張圖鬥快揾返個展品出嚟，豬仔包一揾到即刻勁興奮，孩子確實很易滿足

館內有大電視不斷播出不同種類嘅多樣性生物，就連豬仔包媽媽大部份都未見過，有啲連個名都唔識讀，真係大開眼界！

跟住便前往展覽廊三，裡面有互動多媒體遊戲，有中文及英文兩種語言選擇，重可以拍大頭照。

雖然展館唔大，但都參觀咗40分鐘，林邊生物多樣性自然教育中心外，仲會見到平時好少見嘅植物。

紅屋「體驗自然」工作坊 DIY新春手作

參觀完林邊生物多樣性自然教育中心（紅屋），其實大家仲可以參加館內舉辦嘅公眾活動，其中豬仔包媽媽及豬仔包就參加咗「體驗自然」工作坊。「體驗自然」工作坊由義工及遊客中心職員帶領，透過製作不同主題嘅手工藝品，向大眾介紹有關郊野公園及香港動植物嘅知識，並帶出相關議題，以推廣環境及生態保育信息。工作坊以輕鬆互動方式，由淺入深教育參加者，特別適合親子一同參與。

而家正舉辦嘅工作坊係非常應節嘅「利是有魚」，各位只要到現場報名參加即可參加工作坊，屆時會有職員帶參加者到活動室參加「 體驗自然工作坊 」。工作坊係由義工帶領，未開始前大家都可以先參觀一下活動室陽台外嘅展品，係一啲撲救山火同挖掘工具。

義工首先會介紹一下要整嘅手工，之後再簡單介紹埋魚類生活環境及特性，跟著就開始做手工。「利是有魚」製作過程簡單，豬仔包大部分都可以自行處理，主要利用利是封同及絲帶製作賀年裝飾，好快就可以完成 。其實紅屋每個月都會舉辦不同主題嘅工作坊，大家可以密切留意，即場參加，額滿即止，費用全免。

週末好去處 ｜環保概念之旅免費遊 4D電影+玩AR/VR遊戲+導覽

活動資訊

林邊生物多樣性自然教育中心（紅屋）展館

開放時間：
展覽廊
逢星期一、三至日及公眾假期︰上午九時三十分至下午四時三十分
逢星期二(公眾假期除外)、農曆年初一及初二休館
自然園區
每日上午六時至下午六時

交通：可乘搭公共交通至鰂魚涌英皇道的柏架山道口。沿柏架山道往山上步行15分鐘可到達林邊生物多樣性自然教育中心。

查詢：2670 1030
官網：https://www.afcd.gov.hk/tc_chi/index.html

公眾教育工作坊

「利是有魚」：2023年1月1日至1月29日
「毛條製昆蟲」：2023年2月4日至3月26日

日期及時間
逢星期六、日及公眾假期
上午十時至十二時、下午二時至四時

活動需時：每節約30分鐘
活動網址：https://www.natureintouch.gov.hk/zh/web/nit-web/public-workshop

資料內容及相片獲 豬仔包の開心日常 專頁授權轉載

更多相關文章
週末好去處 ｜屯門室內遊樂場「百田樂園」新店玩後報告
週末好去處 ｜ 精選5大免費STEM兒童探知好去處
週末好去處 ｜ 親子1月必去新春免費工作坊

The post 週末好去處 ｜ 鰂魚涌遊紅屋 參觀生物展覽+體驗自然工作坊 appeared first on 新城教育+.