週末好去處｜推介港島六大好去處超近金鐘及會展站

Metro Admin — Mon, 31 Oct 2022 10:46:00 +0000

東鐵綫會展站正式通車後，由上水來往會展站只需約38分鐘，唔使再搭去九龍塘轉兩條線先到達，比以前方便；而來往金鐘亦只需40分鐘，過海比以前快15分鐘！新界出港島方便咗，一於Plan定港島路線，一程車來回玩返夠盤！

會展站好去處

水上運動及康樂主題區

圖片來源: 木製小輪「珊瑚海號」

主題區全日開放，除咗有一堆兒童遊樂設施及功能活動場地外，當場地更以創作人麥雅端嘅插畫作品「Chocolate Rain」作主題，設有多款色彩繽紛嘅藝術裝置，打卡影相啱晒！夏天熱辣辣，仲可以租用場地上嘅水上單車玩過夠，最多更可以4人一同乘坐，去之前記得上網預約！

灣仔海濱長廊

圖片來源: httpswww.devb.gov.hk

水上運動及位於灣仔海濱，將港島北嘅海濱長廊延長至7.4公里，市民可由石塘咀沿海濱區步行至炮台山。海濱長廊四圍都有唔同嘅影相打卡位，除咗有多個大型相框裝置，仲有霓虹燈裝置，行得熱同攰仲可以喺涼亭下乘涼。而且邊行仲會邊見到「Chocolate Rain」嘅作品，係Chocolate Rain Fans嘅絕對要去朝聖一下！

HarbourChill海濱休閒站

圖片來源: HarbourChill海濱休閒站《香港政府新聞網》

想帶埋寵物望住個海景Chill下，去HarbourChill海濱休閒站可以滿足多個願望！場地上有不同嘅藝術裝置，亦設有一大片草坪，草坪上除咗有蔭棚、座椅、鞦韆，仲有設計獨特嘅戶外階梯平台及桌椅，坐低睇日落勁有Feel！如果想浪漫啲，等到夜晚仲會有發光裝置，場地24小時開放，幾時都去得！

去完會展，梗係去埋附近嘅金鐘啦！雖然金鐘係香港主要嘅商業區及政治中心，不過都有好多地方值得放假行一行！

週末好去處｜裕民坊《YM2與您綠遊仲夏》 1:1古董及全新電動巴士模型展覽

金鐘站好去處

添馬公園

圖片來源: info.gov.hk

由於「中西區海濱長廊」與添馬公園喺設計上統一，而且連接，所以去到添馬公園同時亦可以去埋中西區，公園內有大片草地，一大個海景，飽覽成個維多利亞港野餐簡直係一大享受。另更設有露天劇場及狗公園，想帶埋愛寵去放電都非常合適，如有體力或想向中環發挖，更可沿海濱前往中環海濱活動空間，一次過遊覽多個香港命脈地帶！

香港動植物公園

圖片來源: 香港動植物公園官網

「香港動植物公園」最大特色係有非常多品種嘅動物及植物欣賞，動物方面有不同品種嘅猴子，另外仲有可愛嘅狐獴、樹獺及水獺，除咗有哺乳類動物，仲有多種鳥類及爬蟲類。除咗動物，當然更有不少罕有植物、每月精選開花植物及名木供遊人觀賞。行到攰時，都可以去噴水池、涼亭等打卡影下相，園內更有餐廳及兒童遊樂場，帶小朋友去放電一流！

地址：香港中環雅賓利道

香港公園

圖片來源: 香港公園官網

公園內保留咗多棟軍營文物建築，包括三軍總司令官邸旗桿屋(現為茶具文物館)、羅連信樓(現為香港公園辦事處、紅棉路婚姻登記處)、華福樓(現為教育中心)和卡素樓(現為香港視覺藝術中心)，甚具文化氣息。另外，公園更有人工湖、瀑布、溫室及觀鳥園，可讓遊人感受自然氣息。因香港公園位於太古廣場上，行完公園，仲可以到太古廣場行街購物，啱啱好Fit晒一日嘅行程！

地址：香港中區紅棉路 19 號

The post 週末好去處｜推介港島六大好去處超近金鐘及會展站 appeared first on 新城教育+.

港島區 Archives - 新城教育+

週末好去處 ｜推介港島六大好去處 超近金鐘及會展站