【QA博士系列】牛津劍橋大學申請攻略 Part 1

雖然只係開咗學兩個星期,但係想去外國升學嘅同學又係時候開始準備喇!尤其係打算申請牛津或劍橋大學嘅同學,更加要留意住截止日期!至於申請牛劍有啲咩要注意呢? 今次博士就會同大家講解一下牛津劍橋大學嘅申請流程!

首先要注意嘅就係牛劍只能夠二選一,所以喺揀選邊一間之前最好就做多少少research,睇清楚邊間比較適合你!所有牛劍同埋醫科學科嘅申請都要係10月15日嘅英國時間晚上6點前經英國聯招UCAS遞交,所以申請嘅第一步,就係開咗個UCAS Account先!

UCAS資料

UCAS會要求你提供個人資料、學歷及工作經驗 (如適用)、所選5間院校及學科、個人陳述同埋推薦信,而最後呢2樣就比較複雜喇!

(有關UCAS報名需要注意嘅事項,可以Click入呢度睇下!)

Personal Statement 個人陳述

個人陳述有字數限制,根據UCAS上顯示,文章最多只能夠有47行(大約4000字元),即係約600字。當中必須提到點解選擇呢個科目、將來打算做咩行業同原因,亦可以講下點解想去英國讀書。

學院選擇

牛劍申請比較特別嘅地方,就係學生會需要選擇一個學院!但係如果你未有任何想法,可以選擇Open,咁學校就會將你放入open pool到。

Reference Letter

另一樣比較重要嘅就係Reference Letter!國際學校嘅同學一般可以搵學校嘅Personal Tutor或者係Director of Studies幫你寫。而其他學校嘅同學就可以搵校長或老師寫。

謹記,Referee唔一定係最高職級嘅人先寫得好,相反一個經常接觸你嘅老師會更加了解你!當然,大前提係你覺得呢位老師係會幫你寫得好啦!

 

係咪仲有問題呢? 唔洗急,之後2集博士仲會同大家講下報名之後有咩做!記住留意喇!