Let’s Get Fluffy！今個聖誕旺角朗豪坊呈獻「迪士尼與彼思 — Fluffy Festival」，8大人氣動畫角色化身QQ毛毛球，暖住同我哋一齊迎接聖誕。
8大迪士尼彼思人氣動畫角色包括﹕
《怪獸公司》～毛毛、阿拱
《玩轉腦朋友》乒乓
《熊抱青春記》巨型小熊貓美美
《反斗奇兵》～勞蘇、阿得、賓尼、牛油仔
場內有3大打卡位﹕
Fluffy Festival毛毛球聖誕樹
Bling Bling跳躍大道
Chill夢幻打卡牆
媽媽同豬仔包去到朗豪坊4樓通天廣場，遠遠已經比堆七彩繽紛兼非常夢幻嘅毛毛球吸引住。豬仔包第一時間就衝去同全港首個6米高嘅「Fluffy Festival毛毛球聖誕樹」打卡。
全部毛毛球都超級可愛，令人忍唔住就想攬吓佢哋。豬仔包就逐個逐個角色慢慢揾，估唔到好快就比佢揾齊8個，仲話毛毛同勞蘇最多。響聖誕樹後面，就係「Bling Bling跳躍大道」，大大小小嘅毛毛球好似響會場彈來彈去咁，豬仔包都跟住一齊跑跑跳跳，彈埋一份。
除咗打卡，場內仲開設「Chill Fluffy 期間限定店」，首賣近300款迪士尼Fluffy系列新產品，包括：Fluffy Festival 毛毛球頸巾、毛毛球發光頭箍、毛絨室內拖鞋及毛絨斜挎袋等，分兩個階段發售，岩哂買嚟比豬仔包做聖誕禮物同聖誕Party交換禮物，收到肯定好開心。
買禮物又點少得買埋比自己，媽媽見到期間限定店同ONLLY CASE合作，推出11款Fluffy Festival主題手機殼，全部都好靚，係時候比個藉口自己換新手機殼啦
現場訂購只需選定款式，㨂好型號，加入個人專屬簽名，再入埋送貨資料，只需幾分鐘就完成個人化手機殼訂購手續，非常方便。豬仔包幫媽媽揀咗個「會場限定版」，真知媽媽心意，好期待製成品寄到屋企啊。
Shopping完之後，我哋去埋最後一個打卡位「Chill夢幻打卡牆」，毛毛、阿得與賓尼化身QQ毛毛球，大大小小嘅毛毛球迫爆發光燈箱，豬仔包話佢要幫手擋住，驚佢哋跌出嚟。
如果係LP CLUB會員，更可以用指定積分於換領Fluffy Festival 獨家限定《怪獸公司》毛毛同《熊抱青春記》小熊貓發光毛毛球頭箍，戴住嚟打卡特別搶眼。大家去開旺角，不妨去打個卡、買禮物兼製作個人化手機殼啦
《迪士尼與彼思 — Fluffy Festival》
活動日期：2022年11月16日- 2023年1月1日
活動地點：旺角亞皆老街8號朗豪坊4樓通天廣場
開放時間：11:00 – 22:00
資料內容及相片獲 豬仔包の開心日常 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜香港故宮文化博物館懶人包
週末好去處 ｜新界九龍區四大兒童室內遊樂場玩後報告
