太空館、科學館、藝術館等等大家應該都經常會去，但其實有啲展覽館人流唔多，免費而且又適合小朋友玩架。媽媽想介紹嘅就係響中環嘅展城館City Gallery，室內室外都有唔同互動裝置，大人小朋友都岩玩，係親子嘅好去處。
打卡
戶外展區「大未來歷棋」有唔同嘅打卡展品，包括行李箱、壽司桌、航天走廊、飛機、港珠澳大橋等等。豬仔包係咁走嚟走去，爬上爬落，媽媽想同佢打個卡都唔容易
展覽
展城館樓展廳「創建香港新未來」展區，展示香港的「三大發展方向」，最吸睛係個大型「L」形的LED屏幕，介紹40多個規劃及基建相關項目。豬仔包不斷走，地上就會有亮點，行到地圖上亮點位置，LED 屏幕就會展示相關嘅短片，相當特別。
遊戲
1.戶外嘅「大未來歷棋」棋盤響起點有QR Code可以掃描開始遊戲 ，依照指示擲骰答題目，完成後仲可以換領小禮物添
2. 響3樓嘅「建島未來」展區設有互動遊戲，小朋友可以化身小小規劃師，設計同規劃心目中理想城市。豬仔包起咗超多體育館同公園，務求打造純玩社區，完成規劃就會見到啲建設快速咁起好，仲可以自己㨂架車，睇佢響自己設計嘅社區度遊走，非常好玩又有滿足感
3. 響1樓「下一個世紀的香港」有木粒積木可以比小朋友自由拼砌，豬仔包越砌越高，砌足十層先肯停手。此外，牆上面有好多用LEGO砌成嘅大型節慶活動畫作，搶包山，舞火龍等等。真係估唔到展城館都會見到LEGO，不過就唔夠木粒積木咁吸引豬仔包
4. 十週年尋寶遊戲，響接待處攞集印紙，響展城館揾齊10個蓋印，又可以去接待處換小禮物，仲可以攞本「不一樣的展城館」繪本番屋企同小朋友慢慢睇
我哋由黃昏玩到夜晚，戶外嘅「大未來歷棋」棋盤會有夜間燈光，日間同夜間都可以打卡，完全不同感覺
《「繼往創未來」規劃與基建展覽》
展覽日期: 2022年7月6日至11月30日
開放時間: 星期一至四: 10:00 – 18:00；星期五、六、日及公眾假期: 10:00 – 19:00 *逢星期二休館（公眾假期除外）
地址: 香港中環愛丁堡廣場3號 （近大會堂低座）
户外展區「大未來歷棋」每日延長開放時間至21:30
資料內容及相片獲 豬仔包の開心日常 專頁授權轉載
更多相關文章
週末好去處 ｜元朗商場 KUMAMON 熊遊小鎮 8大打卡位陪你「熊」抱盛夏
週末好去處 ｜香港故宮文化博物館懶人包
週末好去處 ｜新界九龍區四大兒童室內遊樂場玩後報告
