明星成長｜SERRINI 博士級學霸大學便認定靠「創作」搵食

近日林家謙演唱會被受關注，其中為圈內好友Serrini 梁嘉茵放緊假冇收錢都嚟做嘉賓，實在非常捧場，而其實Serrini係一個非常值得欣賞嘅香港女唱作人，欣賞林家謙演唱會時都不妨多留意一下Serrini！Serrini 近年於樂壇成績非常好，憑真性情又帶有修養嘅創作風格及形象，獲得年青人嘅喜愛，每首出自Serrini手嘅歌，都非常破格，歌曲配以新詩般嘅前衛歌詞，不難想像Serrini係一位擁有濃厚文學底蘊嘅女歌手。

熱愛文字及音樂大學時認定以創作搵食

Serrini就讀迦密柏雨中學，中學畢業後於中文大學修讀英文系，繼而再到香港大學進修，修讀文學碩士，隨後亦再修讀香港大學香港研究嘅哲學博士學位，考獲多項獎學金，學歷超強。不過Serrini擁有如此高學歷，卻一心以音樂為目標，將知識融入音樂，期望透過音樂將自己嘅思想傳遞開去，因此上到大學時便自覺要靠「創作」維生。Serrini曾於訪問中表示「如果唔係做歌手，我都唔知做咩？」不過話雖如此，回望過去，Serrini坦言若然而家唔係一名歌手，可能便會成為一名銀行職員或編輯。

圖片來源 : IG@gwendolyn.spot

Serrini表示細個時，受父親影響，自小便接觸音樂，讀書時期已學習多種樂器，如電子琴、小提琴及長笛，從不斷嘗試及放棄囓過程中，更加確定自己對唱歌嘅熱誠，並有一份與生俱來嘅表演欲。如此熱愛音樂及表演，當然少不免會參加校內嘅唱歌比賽，直到大學時更開始萌生要自己寫歌俾自己參賽嘅念頭。Serrini喜歡音樂之餘，亦喜歡文字創作，因認為文字可表達自我，促進溝通，從創作之中可令自己達到理想狀態，因此大學時亦有嘗試寫詩放上網，卻只換來5個LIKE，不甘於此嘅Serrini，因此決心創作一首歌，作曲填詞演唱一手包辦，而此歌就係Serrini代表作之一嘅《蘇菲亞的波霸珍珠奶茶》，雖然歌詞內容搞鬼無厘頭，但卻受到不少網民喜歡，而作品嘅迴響亦令Serrini更加醉心音樂創作。

明星成長｜方皓玟入行初幾經波折曾被退為幕後音樂人

用讀書克服挫敗強大自我靈魂與信念

文學出身嘅Serrini，於社會外界上看似比具有專科知識嘅人輸蝕，但Serrini堅信無論讀咩科都好，其實只要識「做人」，讀咩科都唔會乞食，曾於訪問中直言：「最重要係你個人，做人重要過讀書。」文化底蘊極深嘅Serrini更經常鼓勵學習，除咗常掛在嘴邊嘅「讀多啲書，飲多啲水」，更於香港大學成立「梁嘉茵獎學金」，每年向最多五名修讀文學士課程本地學生，分別發放一萬元獎學金，可謂身體力行。

圖片來源 : IG@gwendolyn.spot

不過現年32歲嘅Serrini，即使於別人眼中係如此強悍無懼，但其實都係由挫敗與失望嘅經歷中跨過來。Serrini表示自己克服挫敗嘅方法係靠「讀書」，透過閱讀不同嘅人物傳記及故事，從中領略更多處世智慧及人生經驗，使內心變得平靜及強大，另外亦會透過音樂將負面情緒釋放或找朋友傾訴。Serrini表示30歲前嘅自己亦與其他人一樣，都有睇唔開嘅時候，亦有被人欺壓嘅時候，但每個經歷都令自已變得更加堅強，亦因為經歷過，而家嘅自己先會變得更加勇敢，更加美好。對於追求創作夢，Serrini認為除咗夠主動及夠勇敢，最緊要係識得保護自己，但終歸都係一句 : 「你要嘅野，你就去爭取。」