週末好去處｜沙田佔地1萬2呎室內遊樂場Kiztopia 設15大遊樂體驗區＋4米巨型滑梯

小朋友總係任何時候都充滿活力，今次就介紹大家去新進駐於沙田新城市廣場嘅大型室內遊樂場「Kiztopia」，場地超大，包保小朋友一定玩過夠！「Kiztopia」９月正式開幕，係新加坡旅遊局最佳景點體驗獎得主，全場佔地12,000呎，有多達15個遊樂體驗區，除咗有小朋友大愛嘅巨型滑梯，另更設8個原創卡通角色為主題職業體驗區，立即先睹為快！

焦點遊樂體驗區逐個數

作為新登陸新城市廣場Play Park嘅首間「Kiztopia」海外旗艦店，唔只一併引入8位可愛嘅原創卡通角色，仲設有15個遊樂體驗區域！

全場最矚目：超巨型城堡攀爬區

兒童攀爬設備中，最刺激好玩莫過於高達4米（約兩層樓高）嘅巨型滑梯，滑梯下面設有大型波波池，另外更有多項極具挑戰性嘅障礙遊戲，如流星錘、攀爬牆、繩索橋、彈床等。

最有教育意義：6大職業體驗區

小朋友可以喺體驗區內穿梭不同空間及玩樂活動，體驗不同職業工作嘅趣味

最考腦力：Drago彈跳城堡＋創意積木遊戲牆

場地佔地超過600呎，分別考驗小朋友體力同腦力

除咗小朋友可以用盡精力，盡情放電，場內更設有「幼童看護區」，適合帶BB玩，另外仲有「Hero Square 英雄廣場」及「Star Lite 派對房」，可以幫小朋友舉辦不同類型嘅活動。玩攰咗都可以去「Bell’s Café」抖一抖充下電或到「親子打卡區」影相留念。

全場15個區域除咗帶嚟感官刺激外，其實仲可以培養孩子8大成長智能，包括圖像、身體、邏輯、人際關係、音樂、自然、自我及文字，去玩之餘又學到嘢，可以俾小朋友動動腦筋。

未開幕先玩！Kiztopia期間限定體驗區

由於遊樂場為收費場地，建議有興趣嘅家長可以喺「Kiztopia」真正開幕前，先到「Kiztopia期間限定體驗區」感受一下遊樂場嘅氣氛！由8月29日至9月11日，大家可以到「期間限定體驗區」認識 Kiztopia 8個原創卡通角色，感受一下遊樂場嘅主題風格，場內更設有互動小遊戲，家長可先讓小朋友體驗一下遊樂場嘅玩樂模式。