Web Interstitial Ad Example

小薯茄朱MIC專訪 (3) |大談入行心得及難關+即興挑戰

12-07-2022
OG PART3

DSE文憑試放榜在即,各位應屆考生未來想向哪方面發展?

小薯茄為代表的人氣網上短片製作團隊,近年來愈發走紅,拍網片成為不少年青人嘅愛好,亦有愈來愈多年青人加入網絡界成為Youtuber,因此我哋特意邀請咗《小薯茄》幕前成員之一「朱Mic」,分享當年DSE放榜嘅心路歷程,並就過來人身份將成功入行嘅貼士傳授俾各位應屆DSE考生! 

朱MIC喺第一節訪問公開當年DSE考績,分享選科心得;第二節更大爆小薯茄招募全過程!嚟到最終章,朱Mic將會為大家大談入行後嘅難關,同時接受30秒嘅即興挑戰,立即去片!拉落啲仲可以睇埋文字足本版。

訪問Part 1傳送門
訪問Part 2傳送門

 
想為DSE放榜升學做好部署?即睇 <<2022 DSE升學全攻略>>

朱Mic訪問文字足本版

問 : 初入行時遇到咩困難 ?

朱Mic答 : 一開始加入小薯茄,個人唔夠放,比較驚,好多時收到劇本,都做得唔夠好,但最驚嘅係我知自己做得唔夠好,然後隔離啲人好Supportive,佢哋知你係啱啱做呢件事,覺得你做得唔好係情有可原,然後俾好多機會你,呢種心情好複雜,因為我好想變好,同時佢哋又好俾機會,有時會寧願你鬧我,都好似會容易啲過呢件事。

但而家慢慢做咗接近一年,開始慢慢明白小薯茄嘅片段節奏,知道我而家咁樣做,剪出嚟大約係咩感覺咩效果,慢慢就開始接納同習慣到。其實都係需要時間,同埋要知道側邊嘅人都係好人,知道佢哋一定會幫你,咁就會解決到自己好驚嘅嘢。

問 : 放榜至今,有迷失過嗎 ?

朱Mic答 : 我覺得主要係遇到一啲迷惘,例如我本身揀咗商科,但後來發現咗一個興趣係完全唔關商科事(即係拍片),我甚至會想將拍片變成工作,我會不斷追溯返究竟當初我選擇呢個學科時,有冇做到一個錯嘅決定。同埋當初自己拍Youtube時,都唔係發展得咁快,唔係超多人睇,冇乜Feedbacks,經常都會感到迷惘,懷疑自己係咪不斷做錯決定,會唔會一開始揀條好多人行過而且相對穩陣嘅路會容易啲成功,但後來我發現如果真係鍾意嗰樣嘢,你一定會搵到時間,及好多種方法去面對,做錯決其實冇所謂,因為每次做決定都會學到好多嘢,總會搵到方法表現自己。

問 : 感到迷惘時,如何應對 ?

朱Mic答:最緊要俾啲信心自己,喺呢個時代攬住一份熱血係好重要,鍾意就去做,唔好俾咁多嘢拉住自己。

想為DSE放榜升學做好部署?即睇 <<2022 DSE升學全攻略>>

問 : 如果想從事網絡創作,應該點做?

朱Mic答: 如果你揀科前,已經知自己對媒體製作或創意行業有興趣,我覺得係可以去讀,而且鼓勵你去讀,因為你好有興趣,好有火。但有可能好多人都比較似我咁,未必咁快搵到自己想要乜,未必咁快有決心選擇一啲相對上冇咁大路,或者俗啲講,一啲冇咁搵到食嘅嘢,但其實都唔緊要,我覺最緊要係擺多啲時間去學習同熟悉呢個範疇嘅嘢,例如我鍾意網絡,我就會去睇好多好多網絡片,去睇IG,睇一啲好短節奏,要你喺3-5秒就講到個Point嘅短片,例如你要熟悉你鍾意嘅嘢嘅文化,心態上要準備好自己。

同時技能上都要準備好,例如我自己一個搞Youtube,其實乜都要一腳踢,要熟Camera嘅操作、要知邊部機係咩時候有啲咩限制、燈光點樣打、剪片Software邊個好、加啲大字又要用After Effect,最後整封面圖又要用Photoshop,Skill Set 係一定要有,因為有時你可能會好有諗法,好多好Creative嘅Idea覺得好爆,但如果你嘅Skill Set都唔夠支援你,就好難Present到一啲咁好嘅Idea俾人睇。所以即使你讀唔讀相關學科都好,最緊要就係Keep住令自己進步,尤其網絡呢啲嘢變得太快,可能你2-3星期冇睇類似嘅嘢,你已經Out咗。所以我覺得如果你真係想投身創意行業,你一定要Keep住Update呢個範疇嘅嘢,俾一啲動力自己去熟悉相關嘅操作。

想為DSE放榜升學做好部署?即睇 <<2022 DSE升學全攻略>>

問 : 最想對DSE考生說的話

朱Mic答:我中學畢業咗幾年,覺得其實DSE係一件好小嘅事,但我好明白(你哋嘅心情),因為我中六嗰陣都覺得好驚,咁而家你哋全部都考完,其實就更加唔使驚,因為DSE真係人生中一個好小嘅Check Point,最緊要係你要搵到自己想做乜,但我都相信有唔少部分嘅人係仲未搵到,但係唔緊要,我覺得你要好善用嚟緊嘅2-4年,去搵你嘅興趣,或你想嘅工作範疇,嚟緊嘅2-4年好關鍵,因為中學畢業後有一個階段可以俾你去探索多啲,所以就算你而家仲盲中中,仲未有好明確嘅方向都唔使驚。

如果你真係好想做創意類、媒體類或者網絡類嘅嘢,真係要做返我頭先所講,緊記要Update自己同埋要裝備自己,因為我相信如果你有興趣你就會有火,你有火就會好有恆心去做好!

問 : 用一句話總結,DSE對你嚟講算什麼 ?

朱Mic答: DSE喺成長階段,好多人以為係一個結束,但其實佢係一個起點



想好似朱Mic咁將興趣變成職業?咁就要盡早為放榜選科作出部署!<<DSE放榜升學全攻略 家長學生天書2022>> 有升學專家為你拆解選科迷思,教你聯招改選策略,更附上香港各大院校嘅科目收生要求!電子書現已上架,立即按此瀏覽


相關文章
小薯茄朱MIC專訪 (1) |DSE成績大公開 + 選科心得
小薯茄朱MIC專訪 (2) |大爆招募全過程及成功原因

dse-小薯茄-招募