Web Interstitial Ad Example

育兒百科 | 幼兒應該幾時戒奶嘴?

25-02-2022
育兒百科-幼兒-奶嘴-戒

嬰兒時期究竟應該幾時幫BB戒奶嘴?太早戒又驚BB唔適應,太遲戒又怕BB有咗依賴性。正面對呢個問題嘅父母,一於聽下嬰幼兒睡眠顧問 Cheryl Chan分享!

四至七月大戒奶嘴最易

其實幾時戒奶嘴同俾唔俾BB食奶嘴一樣,都好取決於父母嘅選擇。不過,喺唔同階段戒奶嘴,方式會唔一樣,容易程度都會有少許差別。喺BB四至七月大嘅時候,戒奶嘴相對容易,雖然部份BB喺呢個階段會開始依賴奶嘴入睡,但係佢哋學習能力好快,只要做好準備,BB好快就可以學習用其他方式入睡。

七至八個月大戒奶嘴較難

而美國兒科醫學會亦建議,當BB六個月大嘅時候,父母應該限制或停止讓BB使用安撫奶嘴。當BB七至八個月大之後,戒奶嘴嘅難度會相對增加,因為BB對呢種安撫工具嘅依賴性變得越來越強,好多時除咗入睡嘅時候需要奶嘴,瞓醒亦可能都需要有奶嘴陪伴在側。 所以當BB越來越大,爸爸媽媽好多時都要有一定嘅決心同耐性先可以成功幫BB戒奶嘴。

如果去到九至十個月大,BB依然有食奶嘴嘅習慣,好多時就會等佢哋再大啲,去到2-3歲左右再戒奶嘴。因為當小朋友大咗,認識嘅嘢多咗,爸爸媽媽可以用各種方式幫佢哋同奶嘴道別,戒奶嘴嘅過程會相對容易!

未提供說明。

嬰幼兒睡眠顧問 Cheryl Chan
從事教育工作多年,其後成為認可的嬰幼兒睡眠顧問,開設「Jovial Sleepers – 嬰幼兒睡眠諮詢」, 提供睡眠諮詢服務及為父母而設的網上嬰幼兒睡眠課程,協助父母解決嬰幼兒睡眠問題,提升小朋友和父母的睡眠質素。Cheryl相信「寶寶瞓得好,爸媽就少煩惱」,希望幫到更多家庭,讓大家都可以有覺好瞓。
Jovial Sleepers – 嬰幼兒睡眠諮詢 (IG: jovialsleepers)