【點解溫極都唔入腦!】效率溫書法 (二)

想溫書溫得efficient啲,淨係前面3個tips係唔夠嘅!快啲睇下仲有啲咩可以做啦!

4. 做Past Paper

Past Paper永遠都係準備考試嘅最有效方法之一!除咗可以睇下以前出過啲咩題目同埋訓練自己答題技巧之外,做Past paper亦都可以幫你習慣考試嘅Format!另外,如果你做past paper嘅時候順便幫自己計時,仲可以知道你喺每個部份要用幾多時間,再調整番步伐!當你分配好適當嘅時間,就唔洗驚做唔切啦!

 

5. 捉住屋企人同佢講你學咗嘅嘢

溫書嘅時候最驚爸爸媽媽、兄弟姐妹阻住哂? 其實唔洗驚嘅,反而仲應該利用佢哋添!試下用最簡單嘅方法同佢哋解釋你學咗嘅嘢,例如係解釋一個theory。你要先消化咗書入面嘅知識,再簡化番先可以解釋到!咁樣可以令自己了解完之後學埋點樣應用,亦都可以搵到自己仲有啲咩唔識!一舉兩得呀!

 

6. 同朋友組織學習小組

約埋幾個friends一齊溫書!不過唔係一齊坐埋你溫你嘅化學,我溫我嘅英文!你要先定下一個科目,再喺之前寫低哂自己仲有啲咩唔識。約埋一齊之後就可以討論大家有啲咩疑問,睇下其他人答唔答到!喺唔離題嘅情況之下,呢個溫書方法除咗可以消除你唔識嘅課題之外,你亦會喺教朋友嘅同時重溫番自己已經識嘅嘢!

 

睇完呢6個tips之後係咪溫書溫得有效率好多呢? 除咗讀書技巧,其實仲有其他嘢係要注意㗎!係咩? 留意住【新城教育+】網頁,下次話你知!