【點解溫極都唔入腦!】效率溫書法 (一)

 

溫緊書? 今次【新城教育+】就同大家講下十個溫書技巧,話你知點樣溫書先最有效啦!

1. 俾自己足夠嘅時間學習

唔好留到最後一分鐘先開始!雖然有啲學生似乎喺最後一刻會有爆炸力溫書,但係對於我哋大多數嘅人嚟講呢個都唔係準備考試嘅最佳方式!為咗做好時間管理,你一定要幫自己Set Up一個溫書時間表,寫低你有幾多個考試要參加同埋考期。睇下邊科最趕、邊科需要多啲時間,然後再根據個priority排番個時間表。 呢個方法可以令你喺溫習各個科目之間搵到一個平衡,唔會溫得一科嚟第二科就GG啦!

 

2. 整理你嘅學習空間

即係你張枱呀!雖然成日都見到啲乜乜大學研究話張枱亂嘅人都係聰明人,不過張枱咁亂你又點溫書呢? 冇位唔再講,枱面點都會有啲干擾你溫書嘅嘢!所以溫書前點都要確保你有足夠嘅空間嚟攤開哂啲教科書同Notes!咁樣就唔洗溫溫下又要走去摷嘢!一離開張枱,就難再番去繼續溫㗎喇!執完張枱,其他環境都要睇下夠唔夠舒適㗎!你有冇足夠嘅光線?你張櫈舒服嗎?你仲見唔見到你部Switch?

嘗試擺脫所有干擾,確保你身處係你覺得舒適嘅環境,咁先可以集中注意力。對於某啲人嚟講,可能要喺完全靜音嘅環境先專注到;對於其他人嚟講,有啲音樂喺Background先得!花少少時間去試下咩方法係令你最專注,搵到適合嘅方法,你會發現溫書嘅效率會大大提高。

 

3. 利用圖表同埋流程/關連圖

溫書嘅時侯,視覺輔助工具可能非常有用!首先揀一個主題,然後寫低你已經識嘅相關內容,咁做你就可以睇到自己仲有啲咩唔識。臨近考試,再將你啲Notes壓縮成為一版嘅圖表。以呢種簡短嘅格式記低你嘅知識可以幫助你快速記番哂你溫過嘅嘢!

 

想知道另外7個Tips係咩? 咁就記住留住我哋嘅Facebook同網頁喇!

資料來源︰QS Top Universities 網頁