【收到面試通知點算好?】大學面試3部曲 - 面試前篇

收到大學面試,究竟應該點做呢? 今日【新城教育+】就同你講下面試三部曲嘅第一部啦!

面試前

時間地點

Check清楚面試時間地點,搵好哂交通路線!如果係香港以外地方面試,睇清楚學校嘅invitation letter / email,留意學校面試幾多日、要帶啲咩、有冇住宿提供、會唔會有其他活動可以參與等資料,提早book好哂交通同住宿,睇定路線點行!當然,情況允許嘅話最好預早幾日去到當地習慣下環境同時差啦!

做定功課

想面試時表現到自己對學科嘅熱誠,除咗溫習一下自己已有嘅相關知識之外,最好睇多啲同你報嗰科相關嘅時事新聞、研究、參考書等。另外,都要睇多次自己寫嘅個人陳述有冇提過一啲其實你冇睇過嘅報告 / 書!因為好多時候學校都會根據你個人陳述寫嘅嘢問問題,如果你其實只係睇咗少少你提過嘅文章,咁就要快啲睇埋佢喇!

模擬面試

有啲問題其實好多大學都會問嘅,例如係介紹下自己、點解會想讀呢一科、點解會揀呢間學校、點解選擇呢個國家、自己嘅優點同弱點、入咗學校可以有咩貢獻、試過遇過咩問題同點解決、畢業後打算做咩etc….所以interview之前就應該要諗下如果呢啲問題真係出現自己應該點答喇!

可以嘅話,搵學校老師、父母,甚至朋友同你做下面試練習,正所謂Practice Makes Perfect,習慣咗之後面試就自然冇咁緊張啦!不過練習還練習,千祈唔好好似背書咁!

諗定問題

面試時考官一定會問你有咩想問!所以最好準備定啲問題,可以係同學科或者學校有關,但係就唔好問啲學校網都揾到答案嘅問題喇!

保持健康

足夠嘅休息同適量嘅運動都好重要!面試時如果病咗就好大機會影響到表現,所以一定要夠精神同埋保持身體健康!

 

想知去到面試日同面試後又有咩要注意呢? 咁就要留意住我哋網頁,下次話你知!

 

資料來源:英國聯招UCAS網頁