【收到面試通知點算好?】大學面試3部曲 - 面試日篇

上次講完面試前,今次講下面試日會應該點做啦!

 

衣著

首先睇下有冇dress code先!有啲學校可能會要求學生Smart / Formal Dress,亦有學校冇特別寫明!如果學校冇特別要求,又唔一定要着西裝嘅!可以着一啲令自己舒服得嚟又唔會令人覺得你唔尊重場合或者唔精神嘅Smart Casual。當然亦唔好太標奇立異啦!

提早到達

最好早十五分鐘到達面試會場,留番少少時間俾自己整理儀容同收拾心情。出發前亦睇清楚係邊棟大樓面試同埋要聯絡邊個,save低聯絡人嘅電話!萬一有意外令到你會遲到,亦可以打個電話同對方講聲。但最好就梗係唔好遲啦!

帶定紙筆

唔一定用得著,不過有需要用嘅時侯冇就好麻煩。

揾出自己特別之處

面試官一日見咁多學生,點樣先可以留低深刻嘅印象呢? 當佢哋叫你講下你自己嘅時侯,最好揾一啲突出啲嘅嘢講下!要俾佢哋知道你對學科、學校嘅熱誠,唔好講一啲網上面都搵到嘅答案,你揾到,其他人都揾到啦!

Body Language

眼神接觸!眼神接觸!眼神接觸!

重要嘅事要講三次!面試時要同考官有eye contact,呢個係基本禮貌,亦可以俾人感覺到你嘅自信!坐姿要正,唔好駝背坐,同時亦唔好做 “打喊露”、伸懶腰呢啲令人覺得你冇精神嘅動作!

用心聆聽

聽清楚人哋問咩,唔好答非所問!如果唔明或者聽唔清楚都唔洗驚嘅,可以禮貌地問多次!

有接受新知識嘅心理準備

Interview除咗係俾學校知道你對學科嘅認識同熱情之外,都係學新嘢嘅時候!面試時學校會問一啲你冇學過嘅嘢,或者係一啲模擬情景。呢個時候就要發揮下想像力,再加埋你已經有嘅知識,嘗試去解答喇!唔洗驚答錯嘅,最緊要係嘗試!要記住,學校係想睇你嘅解難能力同思考過程!

 

下次會講面試後要做啲咩!記得唔好錯過!

資料來源:英國聯招UCAS網頁